ଜୀବନର ନଗ୍ନଚିତ୍ର

ଥରେ ଆସି ଦେଖିଯାଅ

ତୁମ ଗାଁ ମୁଣ୍ଡରେ ଥିବା ସେଇ ଶ୍ମଶାନ ଭୂମିକୁ

କିପରି ଅହଂକାର ସବୁ ଗଦା ହୋଇ ପଡିଛି

ଅବଶେଷ ପାଉଁଶ ରୂପରେ......

ଥରେ ଆସି ଦେଖିଯାଅ

ଗଙ୍ଗାନଦୀର ସେଇ ପବିତ୍ର ଜଳଭାଗକୁ 

କିପରି କୁଢ଼ କୁଢ଼ ହୋଇ

ଗର୍ବ ସବୁ ଭାସି ବୁଲୁଛି

ସମୁଦ୍ରରେ ଲୀନ ହେବାପାଇଁ....

ଥରେ ଆସି ଦେଖିଯାଅ

ଯୁଦ୍ଧ ଭୂମିରେ ହେଉଥିବା

ଯୁଦ୍ଧର ବିଭୀଷିକାକୁ 

କିପରି ସ୍ୱାର୍ଥ ସବୁ ପରାଜୟ ହୋଇ

ଖୋଜିବୁଲୁଛନ୍ତି ଶାନ୍ତିର ରାସ୍ତା......

ଥରେ ଆସି ଦେଖିଯାଅ

ଜଳୁଥିବା ସେଇ ଶ୍ମଶାନର ଜୁଇକୁ

କିପରି ଲୋଭ ସବୁ ଦଗ୍ଧ ହୋଇ

ପ୍ରୟାସ କରୁଛନ୍ତି ପବନରେ ମିଶିବାକୁ.......

ଏଇତ ଜୀବନର ନଗ୍ନଚିତ୍ର