ଜୀବନର ବାଜି

ଜୀବନର ପଥ ବଡ଼ କଣ୍ଟକିତ

ଚାଲି ନ ଶିଖିଛି ଯିଏ

ଝୁଣ୍ଟି ପଡେ ସଦା ଆସେ କେତେ ବାଧା

ଏକାତ ଜାଣିଛି ସିଏ ।

ଅନେକ ବନ୍ଧୁର ପଥ ହୋଇ ପାର

ଜଗତେ ଆଜି ମୁଁ ଠିଆ

ସହିଅଛି ଦୁଃଖ କଷ୍ଟ ବାରବାର

ଭାଳି ଥରିଯାଏ ହିଆ ।

ଜୀବନଟା ମୋର କଲ୍ଲୋଳିନୀ ଧାର

ଅଙ୍କାବଙ୍କା ଯାଏ ବହି

କେବେ ଦିଏ ସୁଖ କେବେ ଦିଏ ଦୁଃଖ

ବଞ୍ଚିଅଛି ସବୁ ସହି ।

ଦୁ଼ଃଖେ ସନ୍ତାପିତ ହୋଇ ମୋ ହୃଦୟ

କଠିନ ଯାଇଛି ହୋଇ

ଆସୁ ଯେତେ ଝଡ ଝଞ୍ଜାର ସକାଳ

କେବେ ନଇଁଯିବି ନାହିଁ ।

ବିନା ସଙ୍ଘର୍ଷରେ ଏ ଧରା ବୁକୁରେ

ତିଷ୍ଠି ରହିପାରେ କିଏ

ସାହସ, ବିଶ୍ବାସ ଯାହା ପାଶେ ଠୁଳ

ଏକା ବାଜି ଜିତେ ସିଏ ।

ପରାଜୟ ଗ୍ଲାନି ଜମା ମୁଁ ଭୁଲିନି

ଅସ୍ତ୍ର କରି ଅନୁଭୂତି

ସଂସାରେ ରହିଛି ସଂସାରେ ରହିବି

ଜୀବନର ବାଜି ଜିତି ।