ଜୀବନ ଯେଉଁଠି

ଜୀବନ ଯେଉଁଠି ଭରା ସପନର

ଅଧାଲେଖା ଆତ୍ମଗୀତି

ଜୀବନ ଯେଉଁଠି ଅୟୁତ ଆଶାର

ସମ୍ଭାବ୍ୟ ପ୍ରେରଣା ନିତି l

ଜୀବନ ଯେଉଁଠି ପୁଣ୍ୟ ପ୍ରଭାତର

ମିଠା ମିଠା ଅନୁଭବ

ଜୀବନ ଯେଉଁଠି ଆଦ୍ୟ ଆଷାଢ଼ରେ

ଅଶନିର ପରାଭବ l

ଜୀବନ ଯେଉଁଠି ଜରା ଯନ୍ତ୍ରଣାର

ଜତୁଗୃହ ଜର୍ଜରିତ

ଜୀବନ ଯେଉଁଠି ଅତି ଭୟଙ୍କର

ଆଶା ଆଶଙ୍କାର ପଥ l

ଜୀବନ ଯେଉଁଠି ମୁଗ୍ଧ ତପୋବନ

ଅନ୍ତରଙ୍ଗ ଅଭିଲେଖ

ଜୀବନ ଯେଉଁଠି ଅପଢ଼ା ଅଭେଦ୍ୟ

ଘୁର୍ଣ୍ଣାୟିତ ସୂକ୍ଷ୍ମ ଚକ l

ଜୀବନ ଯେଉଁଠି ଛାଇ ଆଲୁଅର

ପ୍ରଲମ୍ବିତ ପ୍ରତିଛବି

ଜୀବନ ଯେଉଁଠି ମରୁ ମରୀଚିକା

ଗୋଧୂଳିର ଅସ୍ତରବି l

ଜୀବନ ଯେଉଁଠି ରଣ ହୁଙ୍କାର

ପ୍ରତିହିଂସାର ବହ୍ନି

ଜୀବନ ଯେଉଁଠି ସ୍ୱାର୍ଥ ବିଜଡିତ

ଶବ୍ଦମୟ ପ୍ରତିଧ୍ୱନି l

ସେଇଠି ଆଶାରେ ଏ ନର ପରାଣ

ହେଉଛି ବି ନିତି ଝୁରି

ଜନ୍ମମୃତ୍ୟୁ ମଧ୍ୟେ କ୍ଷୁଦ୍ର ବ୍ୟବଧାନ

ଜୀବନର ନାମ ଧରି l

ମାଧୁର୍ଯ୍ୟରେ ଭରି ପରମାୟୁ ଟିକ

ଆନେ ବାଣ୍ଟି ସେଵା ପ୍ରୀତି

ହରିନାମ ଗାଇ ପୁଣ୍ୟତା ପ୍ରାପ୍ତିରେ

ଚାଲରେ ମାନବ ଜାତି l