ଜୀବନ ଯାତ୍ରା, ଅଛିଣ୍ଡା ଗଣିତ

ଜୀବନ ଯେତିକି ସହଜ ବୋଲି 

ଲାଗି ଥାଏ ଆମକୁ‌‌

ପାଇବା ସେତିକି ସହଜ ନୁହେଁ 

ଯଦି ଯିବା ଆଗକୁ |୧|

ଶିଖି ଥିଲି ଛୁଆ ଦିନେ ବହୁ କଥା, 

ଜୀବନର ସୂତ୍ର

ଦେଖା ଦେଇଛି ଜୀବନ ଯାତ୍ରାରେ 

ଅଛିଣ୍ଡା ଗଣିତ |୨|

ସେଇ ସବୁ ଅଟେ, କ୍ରୋଧ କେବେ 

ମୁଁ କରିବି ନାହିଁ

ଗରବରେ, ଅହଂକାରରେ କେବେ 

ଅନ୍ଧ ହେବି ନାହିଁ |୩|

ସଚ୍ଚୋଟତାର ସହ କରିବି ମୋର 

ପ୍ରତ୍ୟେକଟି କାର୍ଯ୍ୟକୁ 

ଉତ୍ସାହ ପୂର୍ବକ ବଞ୍ଚିବି ଜୀବନର 

ପ୍ରତ୍ୟେକ କ୍ଷଣକୁ |୪|

ସରବ ପରିସ୍ଥିତିକୁ ସାହାସ ସହିତ 

ସ୍ୱାଗତ କରିବି

ରାଜନୀତି ଉର୍ଦ୍ଧ୍ୟେ ରହି ନିସ୍ଵାର୍ଥପର 

ସେବା କରିବି |୫|

ସମାଜର ଦୁଃସ୍ଥ ପାଇଁ ସେବାରେ 

ଜୀବନ ସାରିବି

ଜୀବନର ଗତି ଅନେକ ଉପର

ତଳ ରାସ୍ତାରେ |୬|

କେବେ ହୁଏ ଫୁଲ ଭର୍ତ୍ତି, ମହ 

ମହ ସୁଗନ୍ଧରେ

ଚନ୍ଦ୍ରଗ୍ରହଣର ଚିହ୍ନ କେବେ 

ଫୁଲେଇ ଜହ୍ନରେ |୭|

ପାଇନି ସେପରି ବନ୍ଧୁ ଦୁଇ

ଗୁଣ କରିଦେବ ଖୁସିକୁ

ହରି ଦେଇ ଭାଗ କରି ଦେବ 

ସରବ ଦୁଃଖକୁ |୮|

ମୁଁ ଶାନ୍ତିକାମୀ, ଶାନ୍ତି ରହିଛି 

ହୋଇ ସଦା ଦିବାସ୍ବପ୍ନ

ଲାଗେ ମନେ ଅଶାନ୍ତି ଦେଖି 

ଶରଶଯ୍ୟାର ଆୟୋଜନ |୯|

ଜୀବନ ପଥରେ ମୁଁ ହୋଇଛି 

କେବଳ ଦେଖଣାହାରୀ 

ଲହୁର ଧାର ବହେ ଆଖି ଦିଶୁଛି 

ସୁପ୍ତ ଆଗ୍ନେୟଗିରି |୧୦|

ତଥାପି ଚାଲିଛି, ଅଣ୍ଟା ଆସ୍ତେ 

ଆସ୍ତେ ନଇଁ ଆସିଲାଣି

ବୋଝ ମୁଣ୍ଡେଇ ଚାଲୁଛି ଛାତି

ରେ ଧରି ଅକୁହା କାହାଣୀ |୧୧|