ଜୀବନ ରେଣୁ

କେବେକେବେ ଏହି ମନ ଭାବୁଥାଏ ଏଣୁତେଣୁ

ଅଧା ଖଣ୍ଡିଆ ଗୀତକେତେ ହେଉଥାଏ ଗୁଣୁଗୁଣୁ

ଫେରିଯାଏ କେବେ ଅତୀତକୁ ପବନ ବେଗରେ

ଚେଷ୍ଟା କଲେ ମଧ୍ଯ ଅଟକେ ନାହିଁ ଜୀବନ-ରେଣୁ,

କେବେକେବେ ହସଟିଏ ଆସି ଚିମୁଟିଦେଇ ଯାଏ

ଓଠ ହସିବାକୁ ଭାବିଲା ବେଳକୁ ଆଖି ଓଦା ହୁଏ

କାହାର ଶୁଣେନି ସମୟ କହେ ମୋ' କଥା ତୁ ଶୁଣୁ

ସ୍ୱୟଂ ରାସ୍ତା ତିଆରି ହାତରୁ ଖସେ ଜୀବନ-ରେଣୁ,

ଋତୁର ରଙ୍ଗ ଆସି ପୁଣି ଯାଉଥାଏ କାଳେ ଫେରି

ବୟସର ପ୍ରଶ୍ନ ଏମିତି ଯେ ପରୀକ୍ଷାର୍ଥୀ ଯାଏ ହାରି

ପରୀକ୍ଷା ସୀମା ସରିଯାଏ ତା'ର ଉତର ଜାଣୁଜାଣୁ

ପାଞ୍ଚ ଆଙ୍ଗୁଳି ପାଞ୍ଚ ପଥେ ଫେରିଯାଏ କିଛି ରେଣୁ, 

ସୁଖ ସ୍ୱପ୍ନର ଘର ଛପରଟି ଉଡ଼େ ଭିନ୍ନ ବତାସରେ

ସମୟ ବାନ୍ଧିଛି ଏମିତି ମନକୁ ସେ କି କାନ୍ଦିପାରେ

ଆୟୁଷ ସରଇ ଭାବନା ବେଳାର ବାଲିକୁ ଗଣୁଗଣୁ

ଆକାଶ ମାଟି ହସୁଛନ୍ତି ଦେଖି ବିକ୍ଷିପ୍ତ ଜୀବନରେଣୁ।