ଲାଇବ୍ରେରୀ
ପ୍ରୋଫାଇଲ୍
ଜୀବନ ଗୀତି
ଜୀବନ ଗୀତି
1 min
110
ଆତ୍ମୀୟତା ଆଉ ଆକର୍ଷଣ ନେଇ ମନେ
ଆସେ ଯେବେ ଦ୍ଵନ୍ଦ
ବିତର୍କ ବିମର୍ଷ ହୁଏ ମନେ ପ୍ରାଣେ
ବୁଝି ହୁଏନି ସେ ଭେଦ
କେବେ କେବେ ପୁଣି ଲାଗେ ବୁଝିଗଲି
ଆଉ କେବେ ଲାଗେ ନାହିଁ
ଭାବନାରେ ମୋର ପଡ଼େ ପୂର୍ଣ୍ଣଛେଦ
ମୁଣ୍ଡ ହୁଏ ଝାଇଁଝାଇଁ
ଏକା ପରି ସିନା ପ୍ରତୀୟ ହୁଅନ୍ତି
ଭିନ୍ନତା ରହିଛି ଲୁଚି
ଏହି ଭିନ୍ନତାକୁ ବୁଝି ହୁଏ କିଛି
ବାକି ରହେ ଆଉ କିଛି
ସେ ଗୂଢ ରହସ୍ୟ ବୁଝିବା କଠିନ
ମନ ଯଦି ନୁହେଁ ସ୍ଥିର
ଆତ୍ମୀୟତା ଭାବ ଆସିଗଲେ ଥରେ
ସମ୍ପର୍କ ନିବିଡ଼ତର
ଆକର୍ଷଣ ସଦା କାମନାର ବଶ
ସଂକୀର୍ଣ୍ଣ ଚେତନା ଧାର
ଅନାବିଳ ସ୍ନେହ ମମତା ରଜୁରେ
ଆତ୍ମୀୟତା ବନ୍ଧା ଚିର
ଆକର୍ଷଣ ସିନା କ୍ଷଣିକର ମାୟା
ଆସି ପୁଣି ଚାଲିଯାଏ
ଆତ୍ମୀୟତା ପରା ହୃଦୟ ବନ୍ଧନ
ଆତ୍ମାକୁ ସେ ଛୁଇଁଯାଏ
ଛଳନା କପଟ ସ୍ଵାର୍ଥାନ୍ଵେଷୀ ଭାବ
ଆକର୍ଷଣେ ଲୁଚି ଥାଏ
ଆତ୍ମୀୟତା ସଦା ଶାନ୍ତି ପ୍ରେମ ତ୍ୟାଗ
ତପସ୍ୟାର ଗୀତି ଗାଏ
