ଝରିଯା' ଟିକେ

      

ମେଘରେ ମେଘ, ଝରିଯା' ଟିକେ

ଟୁପୁରୁ ଟାପୁରୁ ହୋଇ,

ବିଲରେ ତା'ର ହଳ କରିବ

ଚାହିଁଛି ଚାଷୀଭାଇ ।

ମନ ଖୁସିରେ ଜମିରେ ସେ ତ 

ବିହନ ଦେବ ବୁଣି,

କରିବ ନାନାଜାତି ଫସଲ

ଉଚ୍ଚ ମାନର ଆଣି ।

ଉପୁଜାଇବ ନାନା କିସମ

ପନିପରିବା, ଶସ୍ୟ,

ପରିଶ୍ରମର ମୂଲ ପାଇବ

ଝରିବ ଓଠୁ ହସ ।

ଠିକଣା ବେଳେ ବର୍ଷିଲେ ତୁହି

ମନ ତା' କୁଣ୍ଢେମୋଟ,

ହୋଇବ ନିଶ୍ଚେ-ଶସ୍ଯ, ପରିବା

ବିକି ଭୁଲିବ କଷ୍ଟ ।

ଅନ୍ୟ ଲୋକଙ୍କ ତୁଣ୍ଡକୁ ଦେବ

ଯୋଗାଇ ସେ ଆହାର,

ଝରିଯା' ଟିକେ ଝରିଯା' ମେଘ

ହସ ଝରୁ ତାହାର ।

ଏମିତିରେ ତ ଝରିଝରିକା

କରୁ ଦୁନିଆ ହିତ,

ସକଳ ଜୀଵଜଗତର ଯେ

ଅଟୁ ତୁ ପରା ମିତ ।