ଝାନ୍ସୀରାଣୀ
ଝାନ୍ସୀରାଣୀ
ଫରଫର ଉଡ଼େ ଆମ ତ୍ରିରଙ୍ଗା l
ତରଳ ତରଙ୍ଗେ ବହୁଛି ଗଙ୍ଗା ll
ଆମ ସୌର୍ଯ୍ୟବୀର୍ଯ୍ୟ ବୀରତ୍ୱ କଥା l
ଇତିହାସେ ଲେଖା ଆମ ବୀରତା ll
ଝାନ୍ସୀରାଣୀ କଥା ପଡ଼ିଲେ ମନେ l
ପୁଲକ ଜାଗଇ ହୃଦୟେ ପ୍ରାଣେ ll
ଛବିଲି ନାମେ ସେ ବୀରା ବାଳିକା l
ରକତେ ଆଙ୍କିଲା ଅଲିଭା ଟୀକା ll
ଅସୀ ହସ୍ତେ ବିଜେ ସେ ରଣଚଣ୍ଡୀ l
ଆଣ୍ଟେ ଧରି ଅଛି ଘୋଡ଼ାର ତୁଣ୍ଡି ll
ପୃଷ୍ଠେ ବାନ୍ଧି ନେଇ ଶିଶୁ ଅଜ୍ଞାନେ l
ବ୍ରିଟିଶ ବିରୁଦ୍ଧେ ମାତିଲା ରଣେ ll
ଖଣ୍ଡା ବୁଲେ ହାତେ ବଡ଼ ଦୁର୍ଦ୍ଦଣ୍ଡୀ l
ସାକ୍ଷାତେ ଅମ୍ବିକେ ସମର ଚଣ୍ଡୀ ll
ସାଥେ ଅଛି ଭାଇ ଚାଖି ଖୁଣ୍ଟିଆ l
ଜଗନ୍ନାଥେ ନିଶ୍ଚେ ଆମର ସାହା ll
ଝାନସୀକୁ କିଏ ନେବରେ କାଢ଼ି l
ରକତ ପିଇବି ଶେଣ୍ଡାକୁ ମୋଡ଼ି ll
ବହୁତେ ଲଢ଼ିଲା ବାହୁକୁ ତୋଳି l
ବ୍ରିଟିଶ ଗୋଳାରେ ପଡ଼ିଲା ଟଳି ll
ଅଠର -ଶ -ସତାବନ ମସିହା l
ଲିଭିଗଲା ଲକ୍ଷ୍ମୀବାଇଙ୍କ ରାହା ll
ଲକ୍ଷ୍ମୀବାଇ ସେହି ଝାନସୀ ରାଣୀ l
ଅମର ତା ଦେଶପ୍ରେମ କାହାଣୀ ll
ମଥା ନତ ହୁଏ ତା ପାଦେ ସ୍ୱତଃ l
ବୀରାଙ୍ଗନା ଶ୍ରେଷ୍ଠା ଦେଶ ଭକତ ll