ଜଗନ୍ନାଥଙ୍କ ବଡସିଂହାର ବେଶ

ଶ୍ରୀକ୍ଷେତ୍ରରେ ବିଜେ ସେ କଳାନାଗର

    ରାଧା ପ୍ରାଣଧନ ଜଗତନାଥ,

ନୀଳାଚକ୍ର ବାନା ଉଡେ ଫର ଫର

    ମୁକତି ପାଆନ୍ତି ନିତି ପତିତ |

ନିତି ବିଧିମତେ ପ୍ରଭୁଙ୍କର ପୂଜା 

    ସେବାୟତ ଭକ୍ତିମତେ କରନ୍ତି,

ସ୍ନାନଠାରୁ ବେଶ ସବୁ ବିଧିପାଇଁ

   ସାରା ଦିବସଯେ ଲାଗିଥାଆନ୍ତି |

ଶ୍ରୀମନ୍ଦିରେ ସ୍ଥିତ ସ୍ୱତ୍ଵଲିପି ନିତି

    ଅନୁସାରେ ପ୍ରଭୁ ହୁଅନ୍ତି ବେଶ,

ନିତିଦିନ ହୁଏ ତିନି ପ୍ରକାରର

    ବଡସିଂହାରରେ ସୁନ୍ଦର ସାଜ |

ପ୍ରଥମରେ ହୁଏ ବସ୍ତ୍ର ଶୃଙ୍ଗାର ଯେ

     ଭୂଷଣ ଶୃଙ୍ଗାର ଦ୍ଵିତୀୟେ ହୁଏ,

ରାତ୍ରି ଆସିଗଲେ ପୁଷ୍ପ ଶୃଙ୍ଗାରରେ

     ପ୍ରଭୁଙ୍କର ବେଶ ବଦଳିଥାଏ |

ଖ୍ରୀଷ୍ଟିୟ ଦ୍ୱାଦଶ ଶତାବ୍ଦୀରୁ ଏହି 

     ପୁଷ୍ପ ଶୃଙ୍ଗାରର ବେଶ ଚାଲିଛି,

ବିଭିନ୍ନ ଫୁଲରେ ତିନି ଠାକୁର ଯେ

     ଅପୂର୍ବ ସୁନ୍ଦର ଦେଖାଯାଆନ୍ତି |