ଈଶ୍ଵରଙ୍କ ହସ୍ତାକ୍ଷର

ଭଲଚିଜ ଥିବା ଦୋକାନକୁ ଗଲେ ବାସନା ତ ଭରିଥାଏ,

କିଣ ବା ନ କିଣ ସବୁ ଗ୍ରାହକ ତା' ସୁବାସକୁ ପାଇଥାଏ |

ଭଲଲୋକ ପାଶେ ଥାଏ ସଦଗୁଣ ମିଳେ ତାଙ୍କଠାରୁ ନ୍ୟାୟ,

ଦିଆନିଆ କିଛି ହେଉ ବା ନ ହେଉ ପ୍ରଭାବ ପଡ଼ିବା ଥାୟ |

ଯାହାର ଭାବନା ଦୁଃସମୟ ଦେଖି ବଦଲୁଛି ଘନଘନ,

ତାକୁ ତ ଭରସା କରି ହେବନାହିଁ ଦେଉପଛେ ଯେତେଧନ |

ସେହି ଲୋକ ସିନା ହୁଅନ୍ତି ନିଜର ଦେଖି ଜାଣେ ଆମ ସୁଖ,

ବୁଝି ପାରନ୍ତି ସେ ଆମ ମନକଥା ହୃଦୟରେ ଥିବା ଦୁଃଖ |

ଜୀବ ଜଗତରେ ମଣିଷ କେବଳ ଅର୍ଜନ କରୁଛି ଧନ,

ଅନ୍ୟ କେଉଁଜୀବ ଧନପାଇଁ କେବେ ବଳାଇ ନାହାନ୍ତି ମନ |

ବିଚିତ୍ର କଥା ଏ' ଅନ୍ୟଜୀବ କେହି ଭୋକରେ ମରନ୍ତି ନାହିଁ,

ଆହୁରି ଆଶ୍ଚର୍ଯ୍ୟ ମଣିଷର ପେଟ-ମନ କେବେ ପୂରେନାହିଁ |

ଆମରି ମୁହଁର ମୁରୁକି ହସ ହିଁ ଈଶ୍ୱରଙ୍କ ହସ୍ତାକ୍ଷର,

ତାକୁ ପୋଛିବାକୁ ଲୁହ ଆଉ ରାଗ ଦୁଇଟି ଅଛି ଆମର ।