ଈଶ୍ବର
ଈଶ୍ବର
ସବୁଜ ସୁନ୍ଦର ଈଶ୍ୱର ସରସ
ସହଜ ପୁଣି ସରଳ
ଗଣିତ ଦର୍ଶନ ପ୍ରଶ୍ନ ଉବାଚକ
ନୁହଁନ୍ତି ଈଶ ଜଟିଳ ।
ସିଏ ଜ୍ଞାନ ବୁଦ୍ଧି ବିବେକ ସୂରୁଜ
ଆଲୋକ ପ୍ରକାଶ ଶକ୍ତି
ନିତ୍ୟ ବିଦ୍ୟମାନ ଅନ୍ତରେ ବାହାରେ
ବ୍ରହ୍ମ ରୂପି ଅବିନାଶୀ ।
ସାକ୍ଷୀ ରୂପେ ସିଏ କରନ୍ତି ନିବାସ
ପ୍ରତ୍ୟେକ ଆତ୍ମା ପରାଣେ
ଦେଖୁଛନ୍ତି ସବୁ ପରମ କାରଣ
ପରମାତ୍ମା ଅନୁକ୍ଷଣେ ।
ପରମ ଆନନ୍ଦ ପ୍ରଭୁ ଆଦିକନ୍ଦ
ମଳୟ ଶାନ୍ତି ସମୀର
ସୁଗୁଣ ସ୍ୱରୂପେ ହୃଦ ସହସ୍ରାରେ
ପୁଷ୍ପ ପ୍ରଫୁଲ୍ଲ କମଳ ।
ସୃଷ୍ଟିର ମଙ୍ଗଳ କଲ୍ୟାଣ ସାଧନ
ପରୋପକାର ସ୍ୱଧର୍ମ
ପାଳିବା ଅବଶ୍ୟ ବ୍ରତ ଜୀବନର
ସୁକର୍ତ୍ତବ୍ୟ ସତକର୍ମ ।
ବିଶ୍ୱାସ ର ମୂଳ ସୃଷ୍ଟିର ଆଧାର
ପରମପିତା ଈଶ୍ବର
ଅନୁସରି ତାଙ୍କ ପଦାରବିନ୍ଦକୁ
ସନ୍ତାନ ହେଉ ଉଦ୍ଧାର ।