ଈଶ୍ୱରଙ୍କୁ ଚିଠି-୨
ଈଶ୍ୱରଙ୍କୁ ଚିଠି-୨
ଭାବ କଲମରେ ସୁମନ ସ୍ୟାହିରେ
ଲେଖୁଛି ଇଶ୍ୱର ଚିଠି
ଆକାଶେ ବତାଶେ ଧରାରେ ସାଗରେ
ପଢିବ ଥାଅ ଯେଉଁଠି ।
ତୁମ ପାଦପଦ୍ମେ କୋଟି ନମସ୍କାର
ଦେଇଛ ମାନବ ଜନ୍ମ
ତୁମରି ପ୍ରସାଦୁ ଜୀଉଛି ଜୀବନ
ଧ୍ୟାୟୀ ତୁମ ଶୁଭ ନାମ ।
ଯାହା ମୁଁ ଦେଖୁଛି ଯାହା ମୁଁ ଶୁଣୁଛି
କରୁଛି କର୍ତ୍ତବ୍ୟ କର୍ମ
କରୁଣା କର ହେ ଜଗତର ନାଥ
ହେଉ ସୃଷ୍ଟିର କଲ୍ୟାଣ ।
କାମ କ୍ରୋଧ ଲୋଭ ହିଂସା ଅହଙ୍କାର
ଦ୍ୱେଷ କାଳକୂଟ ବିଷ
ହେଉ ବିଘଟିତ ପ୍ରଭୁ ନୀଳକଣ୍ଠ
କ୍ଷରୁ ଅମୃତ ନିର୍ଯ୍ୟାସ ।
ସବୁଜ ସୁନ୍ଦର ପ୍ରକୃତି କୋଳରେ
ବିକଶୁ ସୁମନ ପ୍ରାଣ
ଉଦ୍ଭାସୁ ବିଶ୍ୱାସ ଶାନ୍ତି ଶତଦଳ
ସୁସମ୍ପର୍କ ସ୍ନେହ ପ୍ରେମ ।
ନିଖିଳ ପରାଣେ ଭରିଦିଅ ପ୍ରଭୁ
ଭାବ ଭକ୍ତି ସୁମଧୁର
ପ୍ରାପ୍ତ ହେଉ ସର୍ବେ ସୁଲଭରେ ଜ୍ଞାନ
ଦୂର ହେଉ ଅନ୍ଧକାର ।
ତୁମେ ମହାପ୍ରଭୁ ଜଗତ କରତା
ଧର୍ମ କର୍ମ ବିଧାୟକ
ଦିଅ ସଦବୁଦ୍ଧି କରୁଛି ମିନତି
ନାଶ କ୍ଳେଶ ଦୁଃଖ କଷ୍ଟ ।
ପତ୍ର ମାଧ୍ୟମରେ ଭାବ ସମ୍ବେଦନା
ଜୀବନ ପ୍ରତିବେଦନ
ଈତିହୀନ ଭକ୍ତି ନାମ ହୀନ ସ୍ତୁତି
କରିବ ପ୍ରଭୁ ଗ୍ରହଣ ।