ଇଚ୍ଛା ହୁଏ ମୋର

ଇଚ୍ଛା ହୁଏ ମୋର    ତୁମ ସାଥେ ଆଜି

    ବରଷାରେ ଭିଜିବାକୁ

ତୁମ ଛାତି ପରେ    ବାହୁ ବନ୍ଧନରେ

     ପୀରତିରେ ମଜ୍ଜିବାକୁ ||

ଝରି ପଡୁଥିବ    ଝରଝର ହୋଇ

    ଅବାରିତ ବାରିଧାରା

ଭିଜାଇବ ମୋର    ଦେହର ବସନ

     କେଶକୁ ବରଷାଧାରା ||

ମୋ ଭିଜା କେଶରୁ     ବରଷା ଟୋପାଟି

      ତୁମ ଅଧରରେ ପଡି

ମୁକୁତା ସୁଷମା    ଭରିଦେବ ତାହା

    ଗାଲକୁ ଧରିବି ଭିଡି ||

ତୁମ ଗାଲେ ଓଠେ     ମୋ ଓଠ ଲଗାଇ

     ଆଙ୍କି ଦେଇଯିବି ଚୁମା

ସବୁଦିନ ପାଇଁ   ସ୍ନିଗ୍ଧ ଚିବୁକରେ

     ଝଟକିବ ଅରୁଣିମା ||

ବକ୍ଷୋଜ ଯୁଗଳ     ସ୍ପଷ୍ଟ ଦିଶୁଥିବ

     ଅନ୍ତଃବାସ ଭିଜିଯାଇ

 ତୁମ ଦେହେ ତାହା   ଫୁଲ ଶର ପରି

    କାମନା ଦେବ ଜଗାଇ ||

ତୁମ ହାତ ଓଠ     ବୋଲ ମାନିବନି

      ସବୁ ସୀମା ଯିବ ଡେଇଁ

ସମର୍ପି ଦେବି ମୁଁ    ତୁମଠି ନିଜକୁ

    ସରମି ଲତାଟେ ହୋଇ ||

 ବରଷାର ଧାରା    ଝରି ଅବାରିତ

      ଆମକୁ ଭିଜାଉଥିବ

ଆମ ଦୁହିଙ୍କର     ହୃଦର ସ୍ପନ୍ଦନ

     ସମବେଗେ ଚାଲୁଥିବ ||

ପ୍ରୀତିର ପ୍ଳାବନେ    ଭାସିଯିବା ଦୁହେଁ

      ଭସା ନାଆଟିଏ ହୋଇ  

 ଅକାତ କାତ ସେ    ପ୍ରୀତି ବନ୍ୟା ଜଳେ

       ଥଳ କୂଳ ଭୁଲିଯାଇ ||

ବୁଡି ଯାଉଥିବା     ଦିଶୁଥିବା ପୁଣି

     କ୍ରୀଡାରତ ମୀନ ପରି

ଦୁହେଁ ଦୁହିଁଙ୍କର    ବାହୁ ଝୁଲଣାରେ

     ଝୁଲୁଥିବା ଥିରି ଥିରି ||