ହୁଗୁଳା ସଂପର୍କ
ହୁଗୁଳା ସଂପର୍କ
ଜୀବନ ସଉଦା ସରିବା ଆଗରୁ
ଭିନ୍ନ ହୋଇଗଲା ଚଲାପଥ
ଶିଥିଳ ପଡ଼ିଲା ସଂପର୍କ ଉତ୍ତାପ
ମାନେ ରଖିଲାନି ମତାମତ ।
ସାଉଁଟି ହେଲାନି ସ୍ମୃତି କୁ ଏକାଠି
ମେଘ ଢାଙ୍କି ଦେଲା ସବୁକିଛି
ଜହ୍ନ ଲୁଚିଗଲା ବାଦଲ ଦେହରେ
ତାରା ମିଟି ମିଟି କରୁଅଛି ।
ଅପେକ୍ଷାର ମାନେ କିଛି ନାହିଁ ଆଜି
ତେଲ ସରିଲାଣି ଦିପାଳିରୁ
ଆଖି ପତା ଦୁଇ ଭାରି ହୋଇଲାଣି
ମିଳିବ କି ମିଛ ସପନରୁ ।
ନିଦାଘ ରେ ବସି କେତେ ଆଙ୍କି ହେବ
ଫୁଲ ଫଗୁଣର ଚିତ୍ରଗୀତି
ଭାବକଳ୍ପର ଭାବନାରେ ହିଁ ଯଦି
ଶବ୍ଦ ତରଙ୍ଗ ନଥିବ ସାଥି ।
ଆସିଲାଣି ଏବେ ବିଦାୟର ଘଡ଼ି
ଛାଇଲା ସର୍ବତ୍ର ନିରବତା
ହୁଗୁଳା ସଂପର୍କ ଧୂସରିତ ହେଲା
ରହିଲାନି ଆଉ ଗଭୀରତା ।
ନୂତନ ସକାଳ ନୂତନ ଆହ୍ବାନ
ଆଖିରେ ଆଖିଏ ନୂଆ ସ୍ବପ୍ନ
ନୂଆ ସଂପର୍କରେ ସୁର ଲୟ ଦେଇ
କାଟିବାକୁ ହେବ ଏ ଜୀବନ ।