ହରିଣ ଶିକାର

ଯୁବକ ଜଣେ ଶିକାର ପାଇଁ

ବଣକୁ ଗଲେ ଥରେ

ପାଦରେ ଜୋତା ମୁଣ୍ଡରେ ଟୋପି

ବନ୍ଧୁକ ଧରି କରେ |୧|

ଦେଖିଲେ ବଣେ ଚରଇ ଘାସ 

ହରିଣଟିଏ ଆସି

ମାରିଲେ ଗୁଳି ପଡିଲା ଖସି

ଶିକାରୀ ମନ ଖୁସି |୨|

ବୀର ଦର୍ପରେ ଶିକାରୀ ଦେଖେ

ନିକଟେ ଯାଇ ତା'ର

ଚୁଲୁବୁଲିଆ ହରିଣ ଦେହୁ

ବୋହେ ରକତ ଧାର |୩|

କେରାଏ ଦୂବ କଳେ ତା' ଅଛି

ନିସ୍ତେଜେ ଅଛି ଶୋଇ

ଶିକାରୀ ମନ ବ୍ୟାକୁଳ ହେଲା 

କାନ୍ଦିଲେ କଇଁ କଇଁ |୪|

କରିବେ ନାହିଁ ଶିକାର ଆଉ

ପ୍ରତିଜ୍ଞା କଲେ ମନେ

ସେଦିନୁ ସିଏ ଅହିଂସା ନୀତି

କହିଲେ ଆମ କାନେ |୫|

ଯିଏ କହିବ ତାଙ୍କରି ନାମ

ହୋଇବ ସାଙ୍ଗ ମୋର

ଶିଶୁଙ୍କ ପ୍ରାଣ ଅଟନ୍ତି ସିଏ

ଚାଚା ନେହେରୁ ଆମର |୬|