ଆଜିର ନାରୀ
ଆଜିର ନାରୀ
ବଦଳି ଯାଇଛି ଦୁନିଆଟା ଆଜି
ବଦଳିଛି ପରମ୍ପରା,
ଓଢ଼ଣା ଫାଙ୍କରୁ ନାରୀ ମୁଖ କାଢି
ସାଜିଛି ସ୍ୱାଧୀନ ପରା ।
ବିଗତ ଚଳଣି ପାଦର ବେଢ଼ି ଯେ
ବୋହି କୁସଂସ୍କାର ଯେତେ,
ଯେତେକ କାହାଣୀ ତା'ର ଗପ ହୋଇ
ଲୁହ ବୋହି ଅଛି ସତେ ।
ମୁକ ଅଭିନୟ କରିକରି ସିଏ
ଜଡ଼ ପାଲଟି ଥିଲା ଦିନେ,
ସେ ସମୟ ଆଜି ବଦଳି ଯାଇଛି
ଖୁସି ହୁଏ ମନେ ମନେ ।
କେତେ ମହିୟସୀ ନାରୀ ଯେ ଅମର
ହୋଇଛନ୍ତି ଇତିହାସେ,
ଆଜିର ନାରୀ ଯେ ଶୃଙ୍ଗ ଚଢିଯାଏ
ଉଡ଼ିଯାଏ ମହାକାଶେ ।
ଯୁଦ୍ଧ କରିବାକୁ ଜଳ କ୍ରୀଡା ଠାରୁ
ସଭିଙ୍କ କର୍ମ ଆବୋରି,
ଇତିହାସ ପୃଷ୍ଠା ପ୍ରଥମ ଛବିରେ
ନାମ ଅଛି ଯେ ତାହାରି ।
କେଉଁ କର୍ମ ଆଜି ତାକୁ ଭାରି ନୁହେଁ
ପୁରୁଷ ପରି ସେ କରେ,
ସଂସାରର ବୋଝ ମୁଣ୍ଡାଇ ନିଏ ସେ
ସେଥିପାଇଁ ଆଜି ନାଁ ତା'ର ଆଗରେ. ।
ପୁରୁଷଙ୍କ ନୁହଁ ସିଏ କ୍ରୀଡ଼ନକ
ନୁହେଁ ଚାବିଦିଆ କଣ୍ଢେଇ,
ତା'ର ନିଷ୍ଠା, ତା'ର ସାଧନା ବଳରେ
ଦୁନିଆକୁ ଆଜି ସେ ଜିତିଥାଇ ।
ଚନ୍ଦ୍ରପୃଷ୍ଠ ଠାରୁ ଦେଖ ଆଜି ନାରୀ
ରେଳ ଇଂଜିନ ଚଲାଏ,
କେଉଁ ବିଭାଗରେ ତାର ନାଁ ନାହିଁ
ଭାବି ମଥା ଘୁରି ଯାଏ ।
ବାନ୍ଧି ସେ ସାହସ ଅସୀମ ଧୈର୍ଯ୍ୟରେ
ସଂସାର ନାଆକୁ ବାହେ,
ତେଜି ସର୍ବ ସୁଖ,ମାନ ଅଭିମାନ
ସ୍ୱୟଂ କିର୍ତ୍ତୀ ସେ ସାଜିଥାଏ ।
ଜୀବନ ଅଧ୍ୟାୟ ପ୍ରତ୍ୟେକ ପଂକ୍ତିରେ
ପୁରୁଷ ସହ ସଂଯୋଜିତ,
ନାରୀ କଲ୍ୟାଣରେ ଦେଶ ଆଜି ହୁଏ
ପୁଣି ସମାଜ ହୁଏ ଜାଗ୍ରତ ।
ନାରୀ ଶକ୍ତିମୟୀ,କଲ୍ୟାଣମୟୀ ସେ
ଜ୍ଞାନମୟୀ,ବିଶ୍ଵରୂପା,
ନାରୀ କ୍ଷମାଶୀଳା,ସହିଷ୍ଣୁତା ସେତ
ନାରୀ ସର୍ବତ୍ର ପୂଜିତା ।