ହୃଦୟ

ଜୀବନର ସବୁ ଭାବ ଆବେଗରେ

ହୃଦୟ ଦିଅଇ ସାଥ 

ସୁଖେ ସୁଖୀ ହୋଇ ଦୁଃଖେ ଦୁଃଖୀ ହୋଇ

ବାହେ ଜୀବନର ରଥ l

କେବେ ଛଳ ଛଳ ସ୍ନେହ ସୋହାଗରେ

ପ୍ରୀତିର କଦମ୍ବ ତୋଳେ 

ବିରହରେ କେବେ ଉଠିଥାଏ କୋହ

ସେଇ ହୃଦୟର ତଳେ l

କେବେସେ ହୃଦୟ କରୁଣାର ଝର

ନିଜର ପିଲାଙ୍କ ପାଇଁ 

ଦୁଃଖୀଜନଙ୍କର ଦୁଃଖ ବି ଦେଖିଲେ

ବିଗଳିତ ଯାଏ ହୋଇ l

କେବେସେ କାହାର କଟୁ ବଚନରେ

ଭାଙ୍ଗି ଯାଏ କାଚ ପରି 

ଯେତେ ଚେଷ୍ଟା କଲେ ଯୋଡିହୁଏ ନାହିଁ

ହୃଦୟ ହୁଅଇ ଚୁରି l

କେବେ ସେ ହୃଦୟ ଲୁହା ପରି ଟାଣ

ନିଜର ବିପଦ ବେଳେ 

 କଷ୍ଟ ହେଉ ପଛେ ଲୁହ ଲହୁ ପିଇ

ମନୋବଳ ଧରି ଚଳେ l

ହୃଦୟଟି ଏକ ଛୋଟ ଅଙ୍ଗ ସିନା

ନିୟନ୍ତ୍ରଣ ତାର ହାତେ 

ଧୈର୍ଯ୍ୟ ଧରି ସୁଖ ଦୁଃଖ ବେଳେ ସଦା

ଚଳାଏ କର୍ତ୍ତବ୍ୟ ପଥେ l

ହୃଦୟ ସହିତ ହୃଦୟ ମିଶାଇ

ଜଗତେ ଚଳିବା ଆସ 

ଅନ୍ୟର ଦୁଃଖରେ ଆହା ପଦ କହି

ହୃଦେ ତା ଭରି ବିଶ୍ୱାସ l

ଈଶ୍ୱର ବିଶ୍ୱାସ ହୃଦୟକୁ ସଦା

ସାହସ ଯୋଗାଇଥାଏ 

ତାଙ୍କ ନାମ ଧରି ଜୀବନ ପଥରେ

ଖାଲ ଢିପ ମାଡି ଯାଏ ll