ଲାଇବ୍ରେରୀ
ପ୍ରୋଫାଇଲ୍
ହେଲେ ଆସିବାର ବେଳ
ହେଲେ ଆସିବାର ବେଳ
କେତେବେଳେ ସତେ ଆସିବ ସକାଳ
ସୂରୁଯ ରହିଛି ଚାହିଁ
ଜୀବଜଗତକୁ ଆଲୋକ ଦେବାକୁ
ଆସିବ ସେ ବେଗେ ଧାଇଁ ।।
କେତେବେଳେ ସତେ ଆସିବ ଗ୍ରୀଷମ
ପାଦପ ରହିଛି ଚାହିଁ
ବାଟୋଇ ପାଇଁକି ଦେବ ସେ ପରଶି
ତା'ର ସୁଶୀତଳ ଛାଇ ।।
କେତେବେଳେ ସତେ ଆସିବ ଆଷାଢ଼
ବାରିଦ ରହିଛି ଚାହିଁ
ଝରିବ ହୋଇ ସେ ଝରଝର ଯିବ
ସାରା ଆକାଶରେ ଛାଇ ।।
କେତେବେଳେ ସତେ ଆସିବ ଶରତ
ଶେଫାଳି ରହିଛି ଚାହିଁ
ରାତି ହେଲେ ଫୁଟି ମିଠା ବାସ ଆଣି
ଦେବ ସେ ସଭିଙ୍କ ପାଇଁ। ।।
କେତେବେଳେ ସତେ ଆସିବ ହେମନ୍ତ
ଶିଶିର ରହିଛି ଚାହିଁ
ପଡିବ ସେ ଖସି ଘାସରେ ପତରେ
ହେମାଳ ପରଶ ପାଇ ।।
କେତେବେଳେ ସତେ ଆସିବ ପଉଷ
ଫସଲ ରହିଛି ଚାହିଁ
ଆସିବ ସେ ଉଠି ଚାଷୀର କ୍ଷେତରୁ
ଖଳାରେ ରହିବା ପାଇଁ ।।
କେତେବେଳେ ସତେ ଆସିବ ମଳୟ
କୋଇଲି ରହିଛି ଚାହିଁ
ଗାଇବ ସେ ଗୀତ ଆଉ କିଛି କଥା
ମନରେ ତାହାର ନାହିଁ ।।
ଚାହିଁ ରହିବାର ସମୟଟି ସରେ
ହେଲେ ଆସିବାର ବେଳ
ଆସିଗଲେ କେହି ଖେଳିଯାଏ ଖୁସି
ଭଲ ଜମିଯାଏ ମେଳ ।।
