ହେ ସଖା

ତୁମକୁ ମୁଁ ଖୋଜିଛି ହେ ସଖା

ଶୀତୁଆ ସକାଳ କୁହୁଡିରେ

ଗ୍ରୀଷମର ତପ୍ତ ମାର୍ତ୍ତଣ୍ଡରେ

ରିମ୍ ଝିମ୍ ବରଷା ବୁନ୍ଦାରେ

ଶରତର ନିର୍ମଳ ଆକାଶେ

ବସନ୍ତ ମଳୟ ପବନରେ

କଅଁଳିଆ ଫୁଲ ପାଖୁଡ଼ାରେ

ହେମନ୍ତର କାକର ବୁନ୍ଦାରେ

ସବୁଠି ମୁଁ ଖୋଜିଛି ତୁମକୁ

ରଜନୀଗନ୍ଧାର ବାସରେ

ମନ୍ଦିରର ସଞ୍ଜ ଆଳତୀରେ

ନବବଧୂ ଚଉଁରା ଦୀପରେ

ଉଦୟ ସୂର୍ଯ୍ୟର ଅରୁଣିମା

ସାୟାହ୍ନରେ ଗୋଧୂଳି ବେଳାରେ

ଶିଶୁର ସେ ଦରୋଟି କଥାରେ

ସଦ୍ୟସ୍ନାତା ମୁକ୍ତ କବରୀରେ

ଚପଳ ଶିଶୁର ସାରଲ୍ୟରେ

ସାଗରର ଉତ୍ତୁଙ୍ଗ ଢେଉରେ

ଝରଣାର କୁଳୁକୁଳୁ ସ୍ବରେ

ନଦୀକୂଳ ଶୀତଳ ବାଆରେ

ଘଞ୍ଚ ଅରଣ୍ୟର ଗାମ୍ଭୀର୍ଯ୍ୟରେ

ଉପବନ ଶାନ୍ତ ସୌମ୍ୟତାରେ

ସବୁଠି ତ ସମାନ ଭାବରେ

ତୁମକୁ ମୁଁ ଅନୁଭବ କରେ

ସାଗରର ଉତ୍ତାଳ ଲହରୀ

ମରୁଭୂମି ବାଲୁକା ଶଯ୍ୟାରେ

ସୁଗନ୍ଧିତ ପବନ ଢେଉରେ

ବରଷାର ରିମଝିମ୍ ସ୍ବରେ

ତୁମ ଉପସ୍ଥିତି ସବୁଠାରେ

ଯାହାକିଛି ରମଣୀୟ ଦିଶେ

ସବୁଠାରେ ତୁମ ସତ୍ତା ଥାଏ

ସୁନ୍ଦର ଯେ ତୁମରି ପରଶେ