ହେ ସଖା ଦିଅ ଦେଖା

    

କାହା ପାଇଁ ଅଭିଳାଷ ରଖିବି ମୁଁ କୁହ

ତୁମେ ଆସିଲନି ବୋଲି ମନ ମୋ ଅଥୟ ।

ଡାକି ଡାକି ତୁଣ୍ଡ ମୋର ଗଲାଣି ଶୁଖି ଶୁଖି

ସଂସାର ବନ୍ଧନ ମୋହ ତୁମ ପାଦେ ଯୋଖି ।

ଜୀବନ କାଟୁଛି ହେ ବନ୍ଧୁ ବଡ଼ କ୍ଳେଶ ପାଇ

ସମୟ କେତେ ବାକି ଲକ୍ଷ୍ୟ କେତେ ଦୂର ଜାଣି ନ ପାରଇ ।

ବସ ଆସି ମଙ୍ଗଧରି ଉବୁଟୁବୁ ମୋ ଜୀବନ ତରୀ

ହୃଦୟ ନିରତ ଚାହେଁ କରିବାକୁ ତୁମ ଚିତ୍ତ ଚୋରି ।

ଆତ୍ମୀୟ ସ୍ୱଜନ ସୁଖେ ଭୋଳ ଏହି ସୁନ୍ଦର ମହୀ

ସବୁଥାଇ ନ ଥିଲା ପରି ହୁଏନା ଆଉ ସହି ।

ଗର୍ବ ଦମ୍ଭ ଟାଣପଣ ରହିନାହିଁ ଏଇଠି କାହାର

ତୁମ କରୁଣା ଦୟା ବିନା ଚାଲେନା କାହା ସଂସାର ।

ସବୁ ଲୀଳାଖେଳା ସିନା ଚାଲେ ତୁମରି ବଳେ

ତୁମେ ପର କର କାହିଁକି ଏଇ ଭବ ଜଳେ ?

ଦୁଇ ନିଆଁ ମଧ୍ୟେ ଜୀବ ବଡ଼ ନାରଖାର

ମନେପଡ଼ିଲେ ଥରି ଉଠଇ ମୋ ବୁକୁ ଭିତର ।

ଯିବାକାଳେ ତୁମ ନାଆଁ ଥାଉ ମୋ ମୁଖରେ

ଅରଜିବା ଯଶ ନାଶ ଯିବ ଦିନେ ଏଇ ଧରାରେ ।

ବିମୁଖ ହୁଅନା ସଖା ଭଜେ ତୁମକୁ ଅନ୍ତରେ

ଦିଅ ହେ ଶରଣ ପ୍ରଭୁ ତୁମ ଶ୍ରୀପୟରେ ।