ତେର ନମ୍ବର

ଖୁସିରେ ପାଳଇ ଭାଲେଣ୍ଟାଇନ୍ ଚଉଦ ନମ୍ବର ସାଥିରେ

ତେର ନମ୍ବରଟା ଧକ ଧକ ହୋଇ ନାଲିସ କରିଲା ଥାନାରେ

ପୁଲିସ ବାପୁଡ଼ା କୁତୁକୁତୁ ହୋଇ କର୍ତ୍ତବ୍ୟ ଆଳରେ

ଦଶ ରାଜ୍ୟରେ ଅଣ୍ଡାଳେ ହୋଟେଲ ରେସର୍ଟ ଭିତରେ ।

ସହଜ ଜନ୍ତୁ କି ଭାଲେଣ୍ଟାଇନ୍ ବଏ ଧରାପଡ଼ିଯିବ ହାଟରେ

ଦଶ ନାମଧାରୀ ଛଦ୍ମବେଶୀ ସିଏ ନକଲି ଡାକ୍ତର ପେଶାରେ 

କି ଦୋଷ ତାହାର ପ୍ରେମୀ ବନ୍ଧୁଗଣ ବିଚାରିବ ଟିକେ ଚିତ୍ତରେ 

ସ୍ବାମୀ ଛାଡ଼ି କେତେ ଏକାକୀ ଅବଳା ପଡ଼ିଥିଲେ ତା' ମୋହରେ ।

ଦୁଇହାତେ ତାଳି ନ ବାଜିଲେ ବନ୍ଧୁ ଶବଦ କେମିତି ହୁଏରେ

ଗୋଟେ ଅଧେ ନୁହେଁ ଡଜନେ ଦୁଇ କିପରି ପଡ଼ିଲେ ପାଲରେ !

ଦୋକାନ ଆଗରେ ବୁଲା ଷଣ୍ଢ ଠିଆ କିଏ ସେ ଦେଖିନି ସହରେ

ଦେଲେ ଯାଇ ସେ ମୁହଁରେ ଦିଅଇ ନଦେଲେ ଚାଲେ ତା' ବାଟରେ ।

ପ୍ରେମିକା ନଥିଲେ ପ୍ରେମର ସାଧନା ରାସଲୀଳା କାହା ନାମରେ ?

ପାରିବାର ଥିଲା ! ଖସାଇ ନେଇଛି ଲକ୍ଷ ଲକ୍ଷ ତା' ଅଣ୍ଟିରେ

ଗୁମ୍ଫା ଖୋଲିବାର ଯାଦୁ ଜାଣିଥିଲା ଲୁଟୁଥିଲା ମନମର୍ଜ୍ଜିରେ

ତାଙ୍କ ପଇସାରେ କୋଟିପତି ହୋଇ ମସଗୁଲ୍ ରାଜଧାନୀରେ ।

ନାଲିବତୀ ଗାଡ଼ି ଚଢୁଥିଲା ସିଏ ହାଇ ପ୍ରୋଫାଇଲ ବେଶରେ

ଫେକ୍ ଆଇଡି ଜାଲ୍ ଆଧାର କରିଥିଲା ଭିନ୍ନ ନାମରେ

ଅନେଶୋତ ସ୍ତ୍ରୀ ମହାଜନ କିଏ କରିଥିଲେ ଢେଙ୍କାନାଳରେ

ଭାରି ଇଛା ତା'ର ଭାଙ୍ଗିବ ରେକର୍ଡ଼ ଶତକ ହେବ ତା' ନାମରେ ।

ସବଳା ନଥିଲେ ସ୍ବାଧୀନ ଅବଳା ମଜ୍ଜିଥାନ୍ତେ ବିନା ଦ୍ବିଧାରେ ?

ପୁରୁଣା ପାଞ୍ଚଟା ଶାନ୍ତ ପଡ଼ିଲେଣି ନିକିତି ପରଖି ଦଣ୍ଡିରେ 

ମନ କରିଥିଲା ନଅଟାକୁ ଆଣି ଲୀଳା କରିବାକୁ ଏକ ସଙ୍ଗରେ

ବୁକିଂ ସରିଥିଲା ଫାର୍ମ ହାଉସ ଗେଷ୍ଟ ଆସିବାର ଥିଲା ରାତିରେ ।

ମାମୁଁ ପହଞ୍ଚିଲେ ତେର ସାଥିରେ ମନ ମୋହି ଦେଲେ ଠେଙ୍ଗାରେ

ପ୍ରେମୀମାନେ ସବୁ ଲୁଚି ଖସିଗଲେ ହଜିବେ କି ଆଉ ଅନ୍ଧାରେ ?

ଠକ ଧୋକାବାଜ ଦଫାକୁ ଲଗେଇ ଖାକି ଦେଲା ଠେଲି ଜେଲ୍ ରେ

ସଲାମ କରିଲା ବାଃ ରେ ଆଇନ୍ ! ଷଣ୍ଢକୁ ବାନ୍ଧିକି ଓଲେଇ ଛାଡୁଛୁ ପଦାରେ !!