Library
Profile
ହେ ଗୁରୁ
ହେ ଗୁରୁ
ହେ ଗୁରୁ ତୁମେ ଆକାଶ ଠୁ ବଡ
ଧରା ଠାରୁ ମହିୟାନ
ହେ ଗୁରୁ ତୁମେ ଅଜ୍ଞାନ ଅନ୍ଧାରେ
କର ଆଲୋକ ବର୍ଷଣ ।
ହେ ଗୁରୁ ତୁମେ ଦିଗ୍ ଭ୍ରାନ୍ତ ମନରେ
ଦିଗ୍ ଦର୍ଶନ ଭରିଦିଅ
ନିରାଶା ଦିଗନ୍ତେ ଆଶାର ଆଲୋକ
ବିଚ୍ଛୁରଣ କରି ଯାଅ ।
ହେ ଗୁରୁ ତୁମେ ଛନ୍ଦହୀନ ପ୍ରାଣେ
ଛନ୍ଦର ଝଙ୍କାର ତୋଳ
ଅଥଳ ଜଳରେ ଭାସିଯାଉଥିଲେ
ଦେଖାଇ ଦିଅ ହେ କୂଳ |
ହେ ଗୁରୁ ତୁମେ ତିମିରେ ଆଲୋକ
ନିରାଶାରେ ଆଶା ସ୍ରୋତ
ଆପେକ୍ଷ ସପକ୍ଷେ ତୁମେ ନିରପେକ୍ଷ
ତୁମେ ଯେ ଅସରା ବିତ୍ତ ।
ହେ ଗୁରୁ ତୁମେ ଭଙ୍ଗା ମନେ ଭର
ପବିତ୍ର ଗଙ୍ଗାର ଜଳ
ଜୀଇଁବା ରାସ୍ତାରେ ମାଇଲି ଖୁଣ୍ଟ ହେ
ଅଟ ଯେ ସର୍ଵ ସମ୍ୱଳ ।
ହେ ଗୁରୁ ତୁମେ ଜୀବନ ମରୁରେ
ଅଟ ସ୍ରୋତସ୍ୱିନୀ ଧାରା
ତୋୟ ଦାନ କରି ସନ୍ତୋଷ ସାଉଁଟ
ହେ ଦାନୀ ଚିର ଗମ୍ଭୀରା ।
ହେ ଗୁରୁ ତୁମେ ଜୀବନ ପାହାଚ
ଗାରିମାରେ ଦିଅ ଭରି
ତ୍ୟାଗର ମନ୍ତ୍ରରେ ପ୍ରୀତିର ଛନ୍ଦରେ
ଦିଅ ହେ ଓଁକାର ଭରି ।
ଚିର ନମସ୍ୟ ହେ ଚିର ବନ୍ଦିତ ହେ
ଶ୍ରଦ୍ଧାର ନୈବେଦ୍ୟ ନିଅ
ଶ୍ରଦ୍ଧାଞଳୀ ପୁଟେ ପ୍ରଣିପାତ କରେ
ଘେନ ହେ ଗୁରୁ ପ୍ରବର ।
