ମାର୍ଗ ଦର୍ଶକ

କାଲି ପରି ମୋର ମନେ ପଡ଼ିଯାଏ

   ବିତିଥିବା ପିଲାଦିନ

ପାଠ ପଢ଼ୁଥିଲି ଦ୍ଵିତୀୟ ଶ୍ରେଣୀରେ

   ପଢ଼ାରେ ଥିଲା ମୋ ମନ।

କିଛି ସାଙ୍ଗ ମେଳେ ବାହାରିଲି ଦିନେ

     ଯିବାକୁ ରଗଡିଶ୍ଵର

ସେହିଠାରେ ପ୍ରଭୁ ଅଷ୍ଟଶମ୍ଭୁ ଛନ୍ତି

     ଦର୍ଶନେ ମନ ଅସ୍ଥିର।

ମାଆକୁ କହିଲି ସ୍କୁଲ ଯିବିନାହିଁ

     ଯିବି ମୁଁ ଠାକୁର ଦେଖି  

ଏକଥା ମୋହର ବଡ଼ ଭାଇ ଶୁଣି

   କହିଲେ ପାଖକୁ ଡାକି।

ସ୍କୁଲ୍ ବନ୍ଦ କରି ଠାକୁର ଦେଖିବା

   ଜମା ଭଲ କଥା ନୁହେଁ

ମୁଁ କହିଲି ସବୁ ସାଙ୍ଗ ଯାଉଛନ୍ତି

   ଯିବି ତାଙ୍କରି ସାଙ୍ଗରେ।

ମୋର କଥା ଶୁଣି ବଡ଼ ଭାଇ ମୋର

   ବାଡ଼ି ଖଣ୍ଡେ ହାତେ ଧରି

ଗୋଡ଼କୁ ମୋହର ଦେଲେ ଦି ପାହାର

     କାନ୍ଦିଲି ମୁଁ ରାହା ଧରି।

କହିଲେ ଆଜିଠୁ ଦିନେ ହେଲେ ସ୍କୁଲ୍

    ବନ୍ଦ ତୁ କରିବୁ ନାହିଁ

ସେହିଦିନୁ ପାଠ ଶେଷ ପର୍ଯ୍ୟନ୍ତ ମୁଁ 

    ସ୍କୁଲ୍ ବନ୍ଦ କରେ ନାହିଁ।

ହେଉ ଯେତେ ବର୍ଷା ଛତା ଧରି ମୁହିଁ

    ସ୍କୁଲକୁ ଯାଏ ବାହାରି

ମାଆ ମୋର ମନା କରୁଥିଲେ ମଧ୍ୟ

   ଶୁଣେନି କଥା କାହାରି।

ବଡ଼ ଭାଇଙ୍କର ଦୁଇଟି ପାହାର

   ପାଇଁ ଶ୍ରେଣୀରେ ପ୍ରଥମ

ଆଜି ଅଛି ଯାହା ମୋର ପରିଚୟ 

    ସବୁ ତାଙ୍କ ଅବଦାନ।