ହାଇଟେକ୍ ପ୍ରେମ

ଶୁଣିଲା ଦିନୁ ପ୍ରେମ ମାଦକତା

ମନ ହେଲା ହାଇଁ ପାଇଁ

ଖୋଜିବୁଲିଲି ମୁଁ ଫେସବୁକୁରେ

ସୁନ୍ଦରୀ ପାଇବା ପାଇଁ।

ଭୋକଶୋଷରେ ଚିନ୍ତାମଗ୍ନ ହେଲି

ପୁନେଇଁ ଚାନ୍ଦର ଆଶେ

ପାଇଗଲି ମୁଁ ମନର ମଇନା

ଅମରବତୀର ପ୍ରୀତି ସେ।

ପ୍ରେମ କୁହୁକ ଆଜି ଚାଖିଲି

ତା' ପ୍ରେମେ ହେଲି ତଲ୍ଲୀନ

ଚାଟୁକ୍ତି ଆଉ ଆଖି ଚାହାଣୀରେ

ବଢ଼ିଲା ହୃଦ ସ୍ପନ୍ଦନ।

 ସୁଗୋଲ ମୁଖମଣ୍ଡଳ ଅଟଇ

 ନାଆଁଟି ତାର ସୁଇଟି

 କନକନିଆ ଚପଳା ନୟନୀ

 ରୂପରେ ଭାରି ବିୟୁଟି।

ଫେସବୁକୁ ହ୍ଵାଟ୍ସଆପରେ ଚାଟିଂ

ଭିଡିଓ କଲିଂରେ ବିଭା

ବିନା ମେଘରେ ବର୍ଷା କରେ ସିଏ

ଫୁଲରେ ସଜାଇ ଗଭା।

ସାଙ୍ଗେ ରହିବା ସାଙ୍ଗେ ମରିବା

ଦେଇଥିଲୁ ଦିନେ କଥା

ଧୋକା ଦେଲା ଦିନୁ ଲୋ ସଜନୀ

ଘୁରେଇ ଯାଉଛି ମଥା।

ଧନ୍ୟ ସେ ଝିଅ ଧନ୍ୟ ପ୍ରତିଶୃତି

ଧନ୍ୟ ହାଇଟେକ୍ ପ୍ରେମ

ଲୋଡ଼ା ନାହିଁ ଆଉ ତୋ ପରି ସାଥି

ଲାଗୁଛି ଭାରି ସରମ।