ଗୁରୁପୂର୍ଣ୍ଣିମା ବନ୍ଦନା

ପିତା ମାତା ମୋର ଆଦ୍ୟ ଗୁରୁ, ବିଦ୍ୟା ପାଇଁ 

ପାଇଥିଲି ମଧ୍ୟ ବହୁ ଶିକ୍ଷା ଗୁରୁ

ତାଙ୍କରି ଦୟାରେ ଅଜ୍ଞାନ ହଟିଲା, ସମାଜରେ

ମୋର ପରିଚୟ ତାଙ୍କଠାରୁ ।

ଜ୍ଞାନର ଆଲୋକ ପ୍ରଦାନ କରିଣ ମୋର 

ଅଜ୍ଞାନ ଅନ୍ଧକାରକୁ କଲେ ନାଶ

ସେ ମୋ ପାଇଁ ବ୍ରହ୍ମା, ବିଷ୍ଣୁ, ଶିବ, ଏହା 

ଆମ ସଂସ୍କୃତିରୁ ପାଇଛି ସନ୍ଦେଶ ।

ଋଷି ଅବଧୂତ ଜ୍ଞାନ ଆହରଣ ପାଇଁ କହନ୍ତି 

କରିଥିଲେ ଚବିଶ ଗୁରୁ ଗ୍ରହଣ

ଶାସ୍ତ୍ରରୁ ଜାଣିଛି ଗୁରୁଙ୍କ ଅଭିଶାପେ କର୍ଣ୍ଣ 

ବୀର ଯୁଦ୍ଧରେ ହାରିଥିଲେ ପ୍ରାଣ ।

ଗୁରୁ ଆଶୀର୍ବାଦରେ ମହାମୁନି ଶୁକ ପରା 

ପାଇ ପାରି ଥିଲେ ଦିବ୍ଯଜ୍ଞାନ

ଯୁଗ ଯୁଗ ଧରି ଗୁରୁବୃନ୍ଦ ହକଦାର ସଦା 

ପାଇବାକୁ ପୂଜା ଓ ପାଦ ତଳେ ଧ୍ଯାନ ।

ଶାସ୍ତ୍ରରୁ ମୁଁ ଶିଖିଛି ଗୁରୁ ଓ ଗୋବିନ୍ଦ ଦୁହେଁ 

ସମସ୍ତର, ଜଣେ ଅଦୃଶ୍ୟ, ଗୁରୁ ବିଦ୍ୟମାନ

ସେହି ଗୁରୁବୃନ୍ଦଙ୍କୁ କରିଲେ ଭକତି, ଗୁରୁଙ୍କ 

ସନ୍ତୁଷ୍ଟିରେ ହୁଅନ୍ତି ଗୋବିନ୍ଦ ପରା ପ୍ରସନ୍ନ ।

ଆଷାଢ ମାସର ଅନ୍ତିମ ଦିବସେ ଜନମ ନେଲେ 

ବ୍ୟାସଦେବ, ତେଣୁ ସେ ଦିନ ଗୁରୁପୂର୍ଣ୍ଣିମା 

ଗୁରୁବୃନ୍ଦ ଆମ ଚଳନ୍ତି ଠାକୁର, ଆଶୀର୍ବାଦ ନେଇ 

କର୍ମକ୍ଷେତ୍ରେ ଗଲେ ଭୟ ରହେନାହିଁ ଜମା ।

ସେମାନେ ବୁଦ୍ଧି ଜ୍ଞାନ ଦେଇ ଶୂନ୍ୟତାକୁ ଦୂର କରି

ଛନ୍ତି ମୋ ଜୀବନାକାଶରେ 

ଆଜଦିନେ ପ୍ରଣାମ କରୁଛି ମୋର ସମସ୍ତ ଶ୍ରୀ ଗୁରୁ 

ମାନଙ୍କର ପାଦପଦ୍ମରେ ।