ଗୁରୁ ଶିଷ୍ୟ ଶିକ୍ଷକ ଛାତ୍ର

କାହା ନାମ ରାମ ରଖିଦେଲେ ସିଏ ହୋଇ ଯାଏନା ଶ୍ରୀରାମ,

କୃଷ୍ଣ ନାମ ଧରି ଡାକିଲେ କାହାକୁ ହେବନାହିଁ ସେ ଶ୍ରୀକୃଷ୍ଣ ।

ଲକ୍ଷ୍ମଣ ନାୟକ ଦେଶପାଇଁ ଲଢ଼ି ଫାଶୀଦଣ୍ଡ ପାଇଥିଲେ ,

ଆଉ ଜଣେ ସେହି ନାମଧାରୀ ଫାଶୀ ପାଇଥିଲା ଦୁଷ୍କର୍ମରେ ।

ଗୁରୁଥିଲେ ଦ୍ରୋଣ ଗୁରୁ ବି ବଶିଷ୍ଠ ଆଉ କେତେ ମୁନି-ଋଷି,

ଶିଷ୍ୟ ପାଇଁ ସବୁ ତ୍ୟାଗକରି ସିଏ ଜ୍ଞାନ ଦେଉଥିଲେ ବସି ।

ଶିଷ୍ୟଥିଲେ ତାଙ୍କ ଗଳାର ରତନ ଗୁରୁ ଜୀବ ସେ ଜୀବନ,

ଗୁରୁ ପରମ୍ପରା ଗୁରୁକୁଳ ପ୍ରଥା ଆମ ଦେଶରେ ପ୍ରାଚୀନ ।

ଆଧୁନିକ ଯୁଗ ହାଲୋ ହାଏ ଚାଲେ ସବୁ ତ ସ୍ୱାର୍ଥରେ ବନ୍ଧା,

କିଏ ଗୁରୁ-ଶିଷ୍ୟ ପରିଚୟ ଦେଲେ ପରମ୍ପରାକୁ ତ ନିନ୍ଦା ।

ବିଦ୍ୟାଳୟ ଏକ ବ୍ୟବସାୟ କେନ୍ଦ୍ର ଶିକ୍ଷକ ଚାକିରୀ କଲେ,

ପାଠପଢ଼ା ଛାଡ଼ି ଆନ୍ଦୋଳନ କରି ଛାତ୍ରଙ୍କର ଶତ୍ରୁ ହେଲେ ।

ଏକଲବ୍ୟ ପରି ଛାତ୍ର ବି ଅଛନ୍ତି ସାଧନା କରନ୍ତି ଘରେ,

ଘରୋଇ ଶିକ୍ଷାରେ ଉତ୍ତୀର୍ଣ୍ଣ ହୁଅନ୍ତି ଶିକ୍ଷାଚାଲେ ଭାଣ୍ଡାମିରେ ।

ଶିକ୍ଷକ ଦିବସେ ମିଛଗୁରୁ ପୂଜା ମିଛ ପ୍ରଶଂସା ବି ଚାଲେ,

ବର୍ଷଯାକ ପିଲେ ବର୍ଷଣ କରନ୍ତି ସତକୁ ଶୁଣିବ କିଏ ?