ଗୁରୁ ସବୁଠୁ ଉର୍ଦ୍ଧ୍ୱରେ

ପ୍ରଥମ ଅକ୍ଷର ଶିଖେଇଛ ତୁମେ

କୁନି ହାତରେ ମୋ ଖଡ଼ି ଧରେଇ,

ବଡ଼ ହେଇ ଆଜି କବି ମୁଁ ବୋଲାଏ

ଗୁରୁଦେବ ଖାଲି ତୁମରି ପାଇଁ ।

ଟିକି ଓଠରେ ମୋ ଶବଦକୁ ଭରି

ଚକ କଳ ଅଖ ଶିଖେଇ ଥିଲ,

ଆଜି ବକ୍ତା ନାମେ ପରିଚିତ ମୁହିଁ

ଦେଉଛି ମଞ୍ଚରେ ଭାଷଣ ଭଲ ।

ଯାଉଥିଲି ଯେବେ ଅବାଟରେ ମୁହିଁ

ଖାଉଥିଲି ତୁମ ହାତରୁ ମାଡ,

ଆଜି ମୁଁ ପୁଲିସ୍ ଚାକିରି କରୁଛି

ଚୋରଖଣ୍ଟକୁ ମୁଁ କରେ ସାବାଡ ।

ଅସୁସ୍ଥ ବାରତା ଶୁଣି ଗୁରୁ ତୁମେ

ଆସୁଥିଲ ଆମ ଘରକୁ ଧାଇଁ,

ତୁମ ଆଶିଷରେ ଡାକ୍ତର ହୋଇଛି

ରୋଗୀଙ୍କର ସେବା କରୁଛି ମୁହିଁ ।

ମିଛ କହିଲେ ମୁଁ କାନ ଧରି ମୋର

ସତ କହିବାକୁ ବୁଝାଉ ଥିଲ,

ବିଚାରପତି ମୁଁ ବିଚାର କରୁଛି

ନ୍ୟାୟ ଅନ୍ୟାୟକୁ କରି ତଉଲ ।

ଯିଏ ଯେତେ ବଡ଼ ହୋଇଅଛି ଆଜି

ବୈଜ୍ଞାନିକ ଅବା ବୀର ଯବାନ,

କେହି ପାରିବେନି ଅସ୍ବୀକାର କରି

ସବୁଠୁ ଉର୍ଦ୍ଧ୍ୱରେ ଗୁରୁର ସ୍ଥାନ ।