ଗୁରୁ ନାମେ ଅଛି କି ଶକ୍ତି...

ଗୁରୁ ନାମେ ଅଛି କି ଶକ୍ତି

ଗୁଣବାନ ଛାତ୍ର ତାହା ଜାଣିଛି 

ଥରେ ତାଙ୍କ ନାମ ତୁଣ୍ଡରେ ଧରିଲେ  

ମିଳିଯାଏ କୋଟି ଅଜ୍ଞାନୁ ମୁକ୍ତି 

ଗୁରୁ ନାମେ ଅଛି କି ଶକ୍ତି ।

ଅନ୍ଧକାର ଗହନ ବନେ

ବାଟବଣା ହୋଇଲେ ଦିନେ

ଅବାଟରୁ ବାଟ କଡ଼େଇ ନିଅନ୍ତି  

ଆଲୋକର ଶିଖା ମିଳଇ ଦୃଷ୍ଟି 

ଗୁରୁ ନାମେ ଅଛି କି ଶକ୍ତି ।

ଯେବେ ମନ ବିଚଳିତ ଯେ ହୁଏ

ଗୁରୁ ନାମ ମୁଖେ ତ ଥାଏ 

ଅଲୌକିକ ଜ୍ଞାନ କୌଶଳର ସହ  

ଅବୁଝା ମନକୁ ମିଳଇ ଶାନ୍ତି 

ଗୁରୁ ନାମେ ଅଛି କି ଶକ୍ତି ।

ସତ୍ ଅସତ୍ ଜ୍ଞାନ କଳାର ଯୋଗେ

ଦର୍ଶନେ ଅଜ୍ଞାନ ଦୂରେଇ ବାଟେ

ବିଦ୍ୟା ବୁଦ୍ଧି ଦାତା ଦିବ୍ୟଦ୍ରଷ୍ଠା ତୁମେ  

ଦୂରେଇ ପାରନ୍ତି ସବୁ ମନରୁ ଭ୍ରାନ୍ତି

ଗୁରୁ ନାମେ ଅଛି କି ଶକ୍ତି ।

ସତ୍ୟ ଧର୍ମ ନ୍ୟାୟେ ପରିଚାଳିତ

ସମାଜର ବିଜ୍ଞ ପଥ ପ୍ରଦର୍ଶକ 

ଜ୍ଞାନର ଭଣ୍ଡାର ଆପଣା ଭିତରେ

ଗଢ଼ିବାକୁ ଆଉ ଏକ ଅନନ୍ୟ ସୃଷ୍ଟି

ଗୁରୁ ନାମେ ଅଛି କି ଶକ୍ତି ।

ହୀନ ଜୀବନର ଲକ୍ଷ ସାଧନେ

ମିଳେ ଗୁରୁ ତୁମ ନିଦର୍ଶନେ

ତୁମ ଯଶ କୀର୍ତ୍ତି ଅଗାଧ ପାଣ୍ଡିତ୍ୟ

ଯୁଗେ ଯୁଗେ ରହୁ ଅମର ମୁକ୍ତି

ଗୁରୁ ନାମେ ଅଛି କି ଶକ୍ତି ।

ଗୁରୁ ବ୍ରହ୍ମା ଗୁରୁ ଯେ ବିଷ୍ଣୁ

ପାଦତଳେ ମୋ ମଥା ନମୁ 

ଭକ୍ତିର ପ୍ରଣତି ଜଣାଇ ଛାମୁରେ

ଜୀବନ ମୋହର ଯାଉ ଯେ ବିତି

ଗୁରୁ ନାମେ ଅଛି କି ଶକ୍ତି ।

ଗୁରୁଙ୍କୁ ନମଣିବ ଯେ ନର

ଗୁରୁ ଦେବ ସାକ୍ଷାତ ଈଶ୍ୱର

ଏହାକୁ ମାନି ସବୁ କର୍ତ୍ତବ୍ୟ କରିଲେ

ଜୀବନରେ ସବୁ ମିଳିବ ଖୁସି 

ଗୁରୁ ନାମେ ଅଛି କି ଶକ୍ତି ।