ଗୁହାରୁଛି ରଙ୍କ ରଜାକୁ
ଗୁହାରୁଛି ରଙ୍କ ରଜାକୁ
ତୁମେ ସଭାପତି ମୁଖିଆ ପ୍ରଧାନ
ରାଜା ମନ୍ତ୍ରୀ ପ୍ରଶାସକ
ନିରୀହ ପରଜା ଜନ ସାଧାରଣ
ଆମେ ତ ଗରୀବ ରଙ୍କ ।
ତୁମ କୋଠାମାଳ ତଳ ବହୁତଳ
ଦପଦପ ନାଲିବତୀ
ସାଇତା ଜୀବନ ଫରୁଆ ଭିତରେ
ପାପ ସାତଖୁଣ ମାଫି ।
ତୁମେ କର ଯଦି ଅନ୍ୟାୟ ଅନୀତି
ବଳାତ୍କାର ଖେଳା ଲୀଳା
ବିଚରା ଜନତା ମାଛିକୁ ମାରିଲେ
ଜେଲ ଜୋରିମାନା କୀଳା ।
ନ୍ୟାୟ ପ୍ରଶାସନ ବିଚାର ବ୍ୟବସ୍ଥା
ତୁମର ହାତ ବାରିଶି
ଯାହାକୁ ଯେମିତି ପାରିବ ହାଣିବ
ଚଢାଉଛ ଶୂଳୀ ଫାଶି ।
ଭେଳିକି କରୁଛ ଦିନ ଦ୍ୱିପହରେ
ଆକାଶେ ଦେଖାଅ ତାରା
କର ଠକିଭଣ୍ଡି ତୁଚ୍ଛା ପ୍ରହସନ
ଚରିତ୍ର କଳଙ୍କ ଭରା ।
ଦରକାର ଥିଲେ କର ଦଣ୍ଡବତ
କୁହ ମିଠା ମିଠା କଥା
ସରିଗଲେ କାମ ଶଚୁଟିକୁ ଧରିକି
ନଚାଅ ମାର ଗୋଇଠା ।
ପିଟ ନାହିଁ ଢୋଲ ଭାଷଣ ପବନ
ଦେଖୁଛନ୍ତି ଚକାଆଖି
ଉତ୍ତୀର୍ଣ୍ଣ ହୋଇବ କଲେ ଠିକକାମ
ନୋହିଲେ ଯିବ ତ ଠିକି ।
ଆମେ ସମୁଦାୟ ସମାଜ ସର୍ବସ୍ୱ
ଜନସେବା ହେଉ ଲକ୍ଷ୍ୟ
କ୍ଷମତା କ୍ଷଣକ ଦଳବଳ ତୁଚ୍ଛ
ପଦ ନିମିତ୍ତ ମାତ୍ରକ ।
-------