ଗୃହବନ୍ଦୀ - 7

ଏଇ କାଲିର କଥା...

ଗତ କାଲି ରାତିଟା 

ଅନିଦ୍ରା ରେ ବିତିଗଲା, 

ଫର୍ଦ୍ଦ ପରେ ଫର୍ଦ୍ଦ    

ତୁମ ସ୍ମୃତି -------

ମାନସ ପଟରେ 

ଧାରାବାହିକର ଭ୍ରମ ସୃଷ୍ଟି କଲା ll

ନିର୍ଜୀବ ବସ୍ତୁ କୁ ଜାବୁଡ଼ି ଧରି,

ଖାଲି କଡ ଲେଉଟାଇବା 

ସାର ହେଲା ସିନା ---------

ପାହାନ୍ତି ସ୍ଵପ୍ନଟା

ସତ ହେଉ ହେଉ, 

ନିଦ ଭାଙ୍ଗିଗଲା ll

ସକାଳେ କପେ ଚା, 

ଆଉ ଖଣ୍ଡେ ବିସ୍କୁଟକୁ 

ଚୁମ୍ବନ ଦେଉ ଦେଉ ;

ପ୍ରାତଃ ରୁଟିନ୍ ର ଗୋଟେ ବ୍ଲୁପ୍ରିଣ୍ଟ -----

ମନେ ମନେ ସ୍କେଚ୍ 

ହେଇ ସାରିଥିଲା ll

ଭାବିଲି ତୁମ ପାଇଁ ଗୋଟେ, 

ସୁନ୍ଦର ଉପହାର 

ମୋ ନିଜ ହାତରେ, 

ତିଆରିବି ଆଉ ------

ଜନ୍ମ ଦିନରେ ତମକୁ 

ଉପହାର ଦେବି ll

ଗୃହବନ୍ଦୀର ସପ୍ତମ ଦିନଟି 

ବେଶ୍ ବ୍ୟସ୍ତତାରେ 

କାଟି ପାରିବି ବୋଲି ;

ମନେ ମନେ 

କରୋନାକୁ ଅନାଗ୍ରହ

ଧନ୍ୟବାଦ ଦେଉଥିଲି ll