ଘନଘନ ଘନାଘନ ବରଷିଲେ

ଅନମ୍ବରରେ ଅମୋଘ ମେଘ ଆସିଲେ,

ଗଗନରୁ ଘନଘନ ଘନାଘନ ବରଷିଲେ,

ଝରଝର ଝରାଝୋର ବୃଷ୍ଟିପାତ କରିଲେ,

ଉତ୍ତପ୍ତ ମହୀରେ ଆର୍ଦ୍ରତା ଶୈତ୍ୟ ଆଣିଲେ |୧|

ପରବଶ ତରୁ-ଲତା ପୁଲକିତ ହୋଇ ଗଲେ,

ଗଛପତ୍ର ଉପରେ ବର୍ଷା-ବିନ୍ଦୁ ନାଚି ଚାଲିଲେ,

ଜଳଧର ଜଳାଶୟକୁ ଜଳମୟ କରି ଚାଲିଲେ,

ପ୍ରାକୃତିକ ପରିବେଶକୁ ପରିଚ୍ଛନ୍ନ କରି ଦେଲେ |୨|

ଝିପିଝିପି ବର୍ଷାର ଛିଟା ସନ୍ତୋଷ ଦେଇ ଚାଲେ,

ବର୍ଷଣ ବାୟୁର ଅନନ୍ୟ ମେଳଣ ହୋଇ ଚାଲେ,

ଆଶ୍ୱସ୍ତ ଅବନିରେ ଭିନ୍ନ ପ୍ରତିଧ୍ୱନି ହୋଇ ଚାଲେ,

ମୃତ୍ତିକାରୁ ଏକ ନିଆରା ମହକ ଆସି ଆସି ଚାଲେ |୩|

ମେଘମାଳର ପରଦା ସୂର୍ଯ୍ୟ ଚନ୍ଦ୍ର ତାରାଙ୍କୁ ଲୁଚାଇ ଚାଲେ,

ମେଘନାଦ ମେଘଜ୍ୟୋତିର ସନ୍ଦର୍ଶନ ଦେଇ ଦେଇ ଚାଲେ,

ଇନ୍ଦ୍ରଧନୁର ଐନ୍ଦ୍ରଜାଲିକ ସପ୍ତରଙ୍ଗ ବର୍ଣ୍ଣାଳି ଦେଖେଇ ଚାଲେ,

ଘନଘନ ଘନାଘନ ବରଷିଲେ ପାଗ ପରିଧି ଭିଜି ଭିଜି ଚାଲେ |୪|