ଗଛଟିଏ ମୁଁ ଗଛଟିଏ

ଗଛଟିଏ ମୁଁ ଗଛଟିଏ 

ତୁମ ପରିବେଶେ ଅଛି ଯିଏ 

ଗଛଟିଏ ମୁଁ ଗଛଟିଏ ।।

କୋଉକାଳୁ ମୁହିଁ ଠିଆହୋଇଛି 

ସାନରୁ ଏଇଠି ବଡ଼ ହୋଇଛି ।

ସଦାବେଳେ ତୁମ ପାଶରେ ରହି 

ଭଲ ସାଥି ହୋଇ ରହିଛି ମୁହିଁ ।।

ଫୁଲ ଫଳ ପତ୍ର ସବୁ ସଜାଇ

ଆହାର ତୁମକୁ ଯୋଗାଏ ଭାଇ ।

ଗହଳିଆ ଦେହେ ଛାଇକୁ ଥୋଇ

ଥଣ୍ଡା ପବନ ମୁଁ ବୁହାଇ ଥାଇ ।।

କପା ଝୋଟ ତୁଳା ବକଳ ଆଦି

ବସ୍ତ୍ର ପାଇଁ ଯାହା ଦରକାରଟି ।

ମାଟିକୁ ମୋ ଚେର ଜାବୁଡିଧରେ 

ମୂର୍ତ୍ତିକା କ୍ଷୟରୁ ରକ୍ଷା ମୁଁ କରେ ।।

କାଠନେଇ ତୁମେ ଘର ବନାଅ 

ଝରକା ଚଉକି କବାଟ କର ।

ବସୁନ୍ଧରା ଶୋଭା ବଢେ ମୋ ପାଇଁ 

ସୁସ୍ଥ ରୁହ ମୋଠୁ ଔଷଧ ନେଇ ।।

ସଭିଙ୍କୁ ଯାହା ଅତି ମୂଲ୍ୟବାନ 

ଜୀବନେ ଯାହା ଅମୂଲ୍ୟ ଧନ ।

ଅମଳଜାନ ମୁଁ ଦେଇ ଆସୁଛି

ଅଙ୍ଗାରକାମଳ ପାନ କରୁଛି ।।

ଏତେ ଉପକାର କରୁଛି ମୁହିଁ 

ତୁମମନୁ ମୋତେ ଭୁଲୁଛକାହିଁ ?

ସଦା ମୋତେ ଯେବେ କାଟି ଚାଲୁଚ

 କି ହେବ ଅବସ୍ଥା ଜାଣି ପାରୁଛ ?

ଗଛଟିଏ ମୁଁ ଗଛଟିଏ ....।