ଗାଁ ମାମଲତକାର
ଗାଁ ମାମଲତକାର
ସବୁ ଗାଁରେ ଥାଆନ୍ତି କିଛି କିଛି ମାମଲତକାର
କାହା ହାଣ୍ଡିରେ ଜିରା ଫୁଟିଲେ କରନ୍ତି ବିଚାର ।
ହସ୍ତେ ଧରି ରାଜଦଣ୍ଡ ସଦା କରନ୍ତି ବିହାର
ପୂଜା ପାର୍ବଣେ ସଜାନ୍ତି ନିଜକୁ ଚୋପଦାର ।
ଅଛି କ୍ଷମତା ସବୁ କିଛି ହଜମ କରିବାର
ଏମାନେ ଗାଁର ମହାମାନ୍ୟ ମାମଲତକାର ।
ଠାକୁରଙ୍କ ଦ୍ୱାହି ଦେଇ ନାନା ବ୍ୟାଭିଚାରେ ଲିପ୍ତ
ଧର୍ମ ନାମେ ଦୀନ ଜନ ଲୁଣ୍ଠନରେ ସିଦ୍ଧହସ୍ତ ।
ସାମୁହିକ ସ୍ୱାର୍ଥ ତ୍ୟଜି ନ୍ୟସ୍ତ ସ୍ଵାର୍ଥେ ବ୍ୟସ୍ତ
କରିବାକୁ କରଗତ ପରଧନ ସଦା ବ୍ୟାକୁଳିତ ।
ରକ୍ତର ସଂପର୍କେ ଏମାନେ ସୃଜନ୍ତି ବିଭେଦ
ଭାଇ ଖୋଳେ ନିଜ ଭାଇ ପାଇଁ ଖାତ। l
ଏମାନଙ୍କ ଲାଗି ଗ୍ରାମେ ଗ୍ରାମେ କୂଟ
ସତ୍ୟ ଧର୍ମ ନ୍ୟାୟ ଆଜି କଳଙ୍କିତ ।
ସବୁ ମାମଲାରେ କରନ୍ତି ପକ୍ଷପାତି ବିଚାର
ଏମାନେ ଗାଁର ମହାମାନ୍ୟ ମାମଲତକାର।