ଏତିକି ଆଶିଷ ଥାଉ

ମାଆର ମମତା ନଭୁଲି କାଳିଆ

 ପହଣ୍ଡି ଆଜି କଲାଣି,

ନବଦିନ ଯାତ୍ରା କରିବେ ମୋହନ

ମନ ଉଚ୍ଛନ୍ନ ହେଲାଣି ।

ପତିତ ଉଦ୍ଧାରି ଦୁଷ୍ଟଙ୍କୁ ନିବାରି

ରଥେ ବିଜେ ଜଗନ୍ନାଥ, 

ରଥ ଜଗନ୍ନାଥ ପଥ ଜଗନ୍ନାଥ 

 ପୂର୍ଣ୍ଣ ପ୍ରଭୁ ଜଗନ୍ନାଥ ।

ଶ୍ରୀଗୁଣ୍ଡିଚା ଡାକେ ଆସିବ କାଳିଆ

ପଥ ରହିଅଛି ଚାହିଁ,

ଟାହିଆ ହଲେଇ ଯିବତ କହ୍ନେଇ

ଭକତକୁ ନିଘା ନାହିଁ ।

ଭକତ ଆଖିରେ ନୀର ଆଜି ଝରେ

ଦର୍ଶନେ ବଞ୍ଚିତ ହେଲା,

ରଥର ଦଉଡି ଅଣ୍ଟାରେ ତା ଭିଡି

ପୂତ ହେବ ଆଶା ଥିଲା ।

ସବୁ ଆଶା ଆଜି ଉଜୁଡି ଯାଇଛି

ଭକ୍ତ ଶୂନ୍ଯ ରଥଯାତ,

କେମିତି ସହିଛୁ ଜଗତ ବାନ୍ଧବ

 ଭକ୍ତ ବିକଳ ଆରତ ।

ଭକ୍ତ ଜୀବ ଧନ ହେ ମଧୁସୂଦନ

ଭକ୍ତ ବିନା ନ ରୋଚଇ,

ମାଆକୁ ହେଜିଲୁ ଯାତ୍ରାରେ ମଜ୍ଜିଲୁ

ଭକତ ଭୁଲିଲୁ ତୁହି ।

ମାଉସୀ ମାଆର ପୋଡପିଠା ଖାଇ

ଆନନ୍ଦରେ ଯିବୁ ତୁହି,

ଆକୁଳେ ଆରତ କରେ ଯେ ଭକତ

ତୋର ଦରଶନ ପାଇଁ ।

ଭୋଗେ ଭୟ ପ୍ରଭୁ ରୋଗରେ ତ ଭୟ

ଭୟ ପୁଣି ମହାମାରୀ,

ତୁମେ ଥାଉଁଥାଉଁ ଅନ୍ଧାର ଘୋଟିଲା

ଦଳି ନଦିଅ ଗୁହାରି ।

ଭକତ ତୋହର ମନ ବଡଦାଣ୍ଡେ

ବସିଅଛି ବାଟ ଚାହିଁ,

ଉଣା ନକର ହେ, କରୁଣା ତୋହର

ମୋ ପ୍ରଭୁ ଜଗତସାଇଁ ।

କୋଟି ଓଡିଆର ମଉଡ ମଣିତୁ

ଚରଣରେ ତୋ ଶରଣ,

ନହୋଇ ନିର୍ଦ୍ଦୟ ଆହେ ଦୟାମୟ

ଦୂର କର ହେ କଷଣ ।

ଲୋଭ ମୋହ ମାୟା ଭରିଛି ମୋ କାୟା

ମୁକୁଳି ମୁଁ ନ ପାରଇ,

ଟେକି ଚଉ ବାହା ହୁଅ ପ୍ରଭୁ ସାହା

ପ୍ରାଣ ସମର୍ପି ଦିଅଇ ।

ସେବାରେ ତୋହର ମନ ଏ ଦାସର

ନିରନ୍ତରେ ରହିଥାଉ,

ମାଗେ ମହାପ୍ରଭୁ ଚରଣେ ତୋହର

ଏତିକି ଆଶୀଷ ଥାଉ ।