ଏମିତି ହୁଏନି

ଏମିତି ହୁଏନି 

ବାଧ୍ୟ ଅବାଧ୍ୟରେ ଭରିଯାଏ 

ଭୋକ ଭୂଗୋଳର ପରିସଂଖ୍ୟାନ 

କି ଭରିଯାଏ ଛୋଟ ଚଞ୍ଚୁରେ 

ବିଶାଳ ସମୁଦ୍ରର ଜଳରାଶି 

ତଥାପି ପକ୍ଷୀ ଉଡେ ଦୂରକୁ ଦୂରକୁ 

କାହା ଭାଷାରେ ଆକାଶର ଦୈର୍ଘ୍ୟ ମାପିବାକୁ 

କିନ୍ତୁ ବାସ୍ତବରେ ଏମିତି ହୁଏନି ।

ଅଶାନ୍ତ ସମୁଦ୍ରରେ ଅନେକ ଜୁଆର ଆସେ 

କବି କହେ ତା ଯନ୍ତ୍ରଣାର ଗାଥା 

ସବୁକୁ ଦେଇ ଦେଇ ସେ ନିଃସ୍ୱ 

ଦେଖି ପାରେନି କି ଦେଖେଇ 

ତଥାପି ସେ ମଥା ପିଟେ ନିତି ନିତି 

ଏମିତି ହୁଏନି 

ଇନ୍ଦ୍ରଧନୁରୁ ସେ ସବୁତକ ରଙ୍ଗକୁ ଭିଡି ଆଣେ 

ନିଜ ଦୁଃଖର କନଭାସରେ ରଙ୍ଗ ଭରିବାକୁ ।

ଏମିତି ହୁଏନି 

ସ୍ୱର୍ଗର ପାରିଜାତକୁ ଖୋଜି ଖୋଜି 

କେହି କେବେ ତୋଳିପାରେ ଜହ୍ନରେ ଘର 

ଭଲ ଲାଗେ କିଛିକୁ ସ୍ୱପ୍ନରେ ଦେଖିବାକୁ 

ରାତିପାହେ ସ୍ୱପ୍ନ ଭାଙ୍ଗେ 

ପୁଣି ଥରେ ଫେରିବାକୁ ପଡେ 

ବାସ୍ତବତାର ସେଇ ଝାଟି ମାଟି କୁଡ଼ିଆକୁ 

ଏମିତି ହୁଏନି ରାତା ରାତି ବଦଳିଯାଏ 

ହାତଭାଗିନୀର ଭାଗ୍ୟର ରେଖା ସବୁ ।