ଏମିତି ହିଁ ପ୍ରେମ ହୁଏ

ତୁମେ ଦେଲ ସଖୀ ଫୁଲରେ ସୁରଭି

ମୁଁ ଝରିଲି ହୋଇ ଜୋଛନା ଧାର

ତୁମେ ଗାଇଦେଲ ପ୍ରଣୟ ମଲ୍ହାର

ମୁଁ ସାଜିଲି ତୁମ ଗଳାର ସ୍ୱର I

ଆଖିତଳେ ମୋର ପ୍ରେମର ସାଗର

ଢେଉ ହୋଇ ତୁମେ ନାଚିଲ ସେଠି

ତୁମରି ଭିତରେ ନିଜକୁ ପାଇଲି

ଢାଳିଦେଲି ମୋର ଅମାପ ପ୍ରୀତି I

ଦେଖିଲି ତୁମକୁ ନିରେଖି ନିରେଖି

ନିକଟୁ ନିକଟ ହୋଇଲ ତୁମେ

ମୋ ସାରା ସତ୍ତାରେ ବ୍ୟାପିଗଲ ସଖୀ

ମୁଁ ହଜିଲି ତୁମ ମଧୁର ପ୍ରେମେ I

ଆଖିରେ ଉଇଁଲା ଇନ୍ଦ୍ରଧନୁ ମୋର

ରଙ୍ଗୀନ ଦିଶିଲା ମୋ ଚତୁର୍ଦ୍ଦିଗ

ତୁମେ ପାଲଟିଲ ହୃଦୟ ଈଶ୍ୱରୀ

ପ୍ରେମ ପୂଜାବେଦୀ ପୀରତି ଭୋଗ I

ତୁମ ପରଶରେ ଶୁଷ୍କ ତରୁଡାଳେ

କଅଁଳି ଉଠିଲା ନବ ପଲ୍ଲବ

ତୁମରି ମନର ମହା ସାଗରରେ

ଭାସିଲି ହୋଇ ମୁଁ ପ୍ରଣୟ ନାବ I