ଏଇତ ଜୀବନ

    ଜୀବନ ନୁହେଁତ ଏତେବି ସହଜ 

      ଛାଇ ଆଲୁଅର ଖେଳ 

    ଜୀବନ ନୁହେଁତ ଫୁଲର ପାଖୁଡା 

      କେତେ କଣ୍ଟା କେତେ ଫୁଲ ||

     ଏନ୍ତୁଡ଼ି ଶାଳରୁ ଜୁଇ ଯିବା ଯାଏ 

       କେତେ ଘାତ ପ୍ରତିଘାତ 

      ସମୟ ସାଥିରେ ଚାଲିବାକୁ ହେବ 

        କି ବିଚିତ୍ର ଏ ନିୟତ ||

       ସୁଖ ଦୁଃଖ ଭରା ଏଇତ ଜୀବନ 

         ମୁଦ୍ରାର ଦୁଇଟି ପାଶ୍ୱ 

      କେବେ ହସ ଆଉ କେବେ ପୁଣି ଲୁହ 

         ରଖିବାକୁ ହେବ ଧର୍ଯ୍ୟ ||

        

       ଜୀବନରେ ଆସେ ଏମିତି ଏକ ଝଡ଼ 

          ଦିଶୁଥାଏ ଅନ୍ଧକାର 

       ଭାଙ୍ଗି ଦେଇଥାଏ ସପନର କୁଡ଼ିଆ 

          ଆଶା ହୁଏ ଚୁରମାର ||

        ମଣିଷ ଜୀବନ ଅବଶ୍ୟ କଠିନ 

          ଜିଇଁବା ଲାଗଇ କଷ୍ଟ 

        ତଥାପି ମନରେ ସାହସ ଜୁଟାଇ 

         ଚାଲୁଥିବା ଆମେ ବାଟ ||