ଏହି ଝଡ ପରେ

ଏହି ଝଡ ପରେ

ଚାଲ କିଛି କ୍ଷଣ ବସିବା ,

ସାଗର ର ଅଗଣିତ ଅଶାନ୍ତ ଲହରୀ ରେ

ଧୋଇ ହୋଇ ଯାଇଥିବା ବାଲୁକା ଶଯ୍ୟାରେ,

ଅନୁଭବ କରିବା ସେଇ ଯନ୍ତ୍ରଣା କୁ,

ଯାହା ଛୋଟ ଛୋଟ ବାଲିଘରକୁ

ଉଦରସ୍ଥ କଲାବେଳେ

ସମୁଦ୍ର ଦେଇ ଗଲା ।

ଏହି ଝଡ ପରେ

ଚାଲ କିଛି କ୍ଷଣ ବସିବା,

ତୋଫାନ୍ ରେ ଧ୍ବସ୍ତ ଛପର ଓ ଆଜବେଷ୍ଟସ୍ ଉପରେ ,

ସେଇ କ୍ଷତିରୁ ଆକଳନ କରି ନେବା,

ଆମ ସଂପର୍କ ଛାତର ଦମ୍ଭ ,

ହିସାବ କରି ନେବା,

କେତେ ଭାଙ୍ଗି ଦେଇଛି ଏ ଝଡ

ଆଉ କେତେ ଭରି ଦେଇଛି

ପୁରୁଣା କିଛି ଜଖମ ଅତୀତର ।

ଏହି ଝଡ ପରେ

ଚାଲ କିଛି କ୍ଷଣ ବସିବା,

ସେଇ ଉଜୁଡା ଆମ୍ବ ତୋଟାରେ,

ଅଦିନରେ ବାଧ୍ୟତାମୂଳକ ପତ୍ରଝଡା

ଦେଇଥିବା ଶତ ସହସ୍ର ପତ୍ର ପରି,

ଝାଡିଝୁଡି ଦେବା ଆମେ

ଆମ ଭିତରର ତିକ୍ତତା କୁ ।

ଏହି ଝଡ ପରେ

ଚାଲ କିଛି କ୍ଷଣ ବସିବା,

ସୂର୍ଯ୍ୟୋଦୟ ଦେଖିବାକୁ

ସେଇ ଚନ୍ଦ୍ରଭାଗା ବେଳାରେ ,

ଲୋହିତ କଅଁଳ କିରଣକୁ

ଆମ ଦେହ ସାରା ବୋଳି ହୋଇ,

ନୂତନ ଏକ ସକାଳ ପରି

ପୁରୁଣା ଅନ୍ଧକାର ସବୁକୁ ପଛରେ ପକାଇ,

ପୁଣି ଥରେ ଆରମ୍ଭ କରିବା

ତୁମ-ମୋ ସଂପର୍କ ର ମୂଳଦୂଆ ।