ଏ...କ'ଣ ରାଗିଗଲ କି

ଏ.... କ'ଣ ଏତେ ସବୁ ଭାବୁଛ

ମୁଣ୍ଡେ ହାତ ଦେଇ ବସି କି ?

ଭାବୁଛ ଯଦି ନିଜର

ହାଲୁକା ଲାଗିବ ମନ

କହିଦିଅ ମୋତେ ଖୋଲିକି ?

ଏ..... ମୋ କଥା ତୁମକୁ ଶୁଭୁଛି ?

ବସାଇଥିବା ଚାହା

ଉତୁରି ଯାଉଛି ପଶି ଚୂଲିକି,

ନ କହି ମନର କଥା

କରୁଥିବ ଯଦି ଚିନ୍ତା

ସତ ଶହେ ପ୍ରତିଶତ

ଭାବିପାର ତୁମେ ମିଛ

ଦୁଇ ଗୁଣ ବଢି କଷ୍ଟ ଦେବ ନାହିଁ କି ?

ହଁ...ମାନୁଛି ମୁଁ ଆସିଅଛି ଖାଲି ଖାଲି

ଆଣିନାହିଁ ବଜାରରୁ ସଉଦା ମୁଁ କିଣିକି ,

ଏବେ ନାହିଁ ପାଖେ ଅର୍ଥ ଖାଲି ମୋ ପାକିଟି

ଦୁଇ ତିନି ଦିନ ପରେ

ମିଳିଯିବ ମାସିକ ଦରମା ,

ଚିଠିର ଜିନିଷ ସବୁ ଆଣିଦେବି କିଣିକି

କିଛିଦିନ ଚଳିଯିବା ଆମେ ଟାଣିଟୁଣିକି ।

ଏ.... ମୁହଁ ଦିଶେ ଫଣଫଣ

କ'ଣ ରାଗିଗଲ କି ? 

ଦେଖି ତୁମ ରୀତିନୀତି

ମନେ ଲାଗେ ବଡ ଭୀତି

ଚାଲିଗଲେ କାମକୁ ମୁଁ

ହେଉଥିବ ସୁଁଉ ସୁଁଉ

ଉପାସ ଭୋକେ ଶୋଇବ

ରାଗେ ମୁହଁ ମାଡିକି ।

ଏ....ମୁହଁ ପୋତି ବସ ନାହିଁ

ଶୁଣ ଥରେ କଥା ମୋର ଚାହଁ ମୋ ଆଡିକି 

ଅଭାବ ତ ଅଛି ଆଜି ଦୂର ହେବ କାଲି କି ;

ମଣିଷର ମନ ଯଦି ଥିବ ଖୁସି

ଲାଗଇ ସବୁ ସୁନ୍ଦର 

ମନେହୁଏ ପାଶେ ସବୁ ଭରପୂର ଅଛି

ଥରଟିଏ ହସି ଦେଖ

ଚେହେରା ବି ଉଠିବ ଚମକି ।

     ------