ଏ ଦୁର୍ଦ୍ଦିନରୁ ରକ୍ଷାକର

ଝୋଟିଚିତା ସବୁ ସପନ ହେଲାଣି

ଚାଳଘର ହଜିଯାଏ

ଲଟେଇବା ପାଇଁ ଲାଉଡଙ୍କ ଏବେ

ଜାଗାଟିଏ ଖୋଜିହୁଏ I

ଚାଳଘର ସବୁ ହଜି ଯାଇଛି ଲୋ

ଶୁଖିଲାଣି ଗାଁ ନଈ

ତୋଟାମାଳେ ଆଉ ଗଛଟିଏ ନାହିଁ

ବାଟୋଇ ପାଉନି ଛାଇ I

ଗାଈଆଳ ଟୋକା ବଇଁଶୀର ସ୍ୱର

ଶୁଭୁନାହିଁ ସଞ୍ଜବେଳେ

ଘରେ ଘରେ ଆଜି କେଉଁପରି ଦେଖ

ରାଜନୀତି ନିଆଁ ଜଳେ I

ପ୍ଲାଷ୍ଟିକ ଫୁଲରେ ଦେବପୂଜା ହୁଏ

ଫୁଲଗଛ ଆଉ ନାହିଁ

ଜବର ଦଖଲ ହେଲାଣି କେବଠୁ

ଗାଁ ଶମଶାନ ଭୂଇଁ I

ବାରମାସେ ତେର ପରବ ହେଉନି

ହଜିଲାଣି ପରମ୍ପରା

ଚିରା ଛିଣ୍ଡା ପିନ୍ଧି ପୁଅ ଝିଅ ବୋହୂ

ବୁଲୁଛନ୍ତି ଗାଁ ସାରା I

ଗାଁ ରେ ଗାଁ ରେ ମଦଭାଟି ଖୋଲା

ସରବେ ଶ୍ରମ ବିମୁଖ

ଏଭଳି ଦୁର୍ଦ୍ଦିନେ ଗ୍ରାମ ସଂସ୍କୃତିକୁ

ରକ୍ଷାକର ପଦ୍ମମୁଖ I