ଦୟାକର ଲକ୍ଷ୍ମୀପତି

ଏକା ଏକା ବାଟ ଚାଲୁଛି ମୁଁ ପ୍ରଭୁ

ସାହା କେହି ନାହିଁ ମୋର

ତୁମ ନାମ ନେଇ ଜୀବନ ବଞ୍ଚୁଛି

ଧରିନିଅ ମୋର କର I

ସୁଖରେ ଦୁଃଖରେ ବିପଦଆପଦେ

ତୁମକୁ ଭରସା କରି

ସଂସାର ନାଆରେ ପାଦ ମୁଁ ଦେଇଛି

କରିଦିଅ ମୋତେ ପାରି I

ଜାଣିନାହିଁ ତୁମ ପୂଜା ଅରଚନା

ନାହିଁ ମୋର ଦିବ୍ୟଜ୍ଞାନ

ତୁମେ ଅଗତିର ଗତି ମହାପ୍ରଭୁ

ଭାବଗ୍ରାହୀ ନିରଞ୍ଜନ I

କ୍ଷୀର ସାଗରରେ ବାସୁକୀ ଶେଯରେ

ଅନନ୍ତ ଶୟନ କରି

ବିଶ୍ୱ ବ୍ରହ୍ମାଣ୍ଡକୁ ଚଳାଇ ନେଉଛ

ଲକ୍ଷ୍ମୀପତି ନରହରି I

ତୁମେ ଦୟାକଲେ ପଙ୍ଗୁ ଲଙ୍ଘେ ଗିରି

ବାଚାଳ ହୁଅଇ ମୁକ

ତୁମ ସଂସାରରେ ଅନାଥ ହୋଇ ମୁଁ

ଡାକୁଛି ଶ୍ରୀ ପଦ୍ମମୁଖ I

କୁରୁଣା ସାଗର କରୁଣା ତୁମର

କରିବନି କେବେ ଉଣା

ତୁମରି ଶ୍ରୀହସ୍ତ ମଥାପରେ ଥିଲେ

ହେବିନି ମୁଁ ବାଟବଣା I