ଦୁଇ ଧାର ଲୁହ
ଦୁଇ ଧାର ଲୁହ
ବୟସର ଅପରାହ୍ନେ ଏକାକୀ
ଦୁର୍ବିସହ ଜୀବନ
ପିତାମାତା,ଭାଇ,ସ୍ବାମୀ,ବଡପୁଅ
ସଭିଏଁ ଆରପାରି ରେ ।
ସ୍ତ୍ରୀ କଥାରେ ସାନପୁଅ
ଛାଡି ଗଲା ସୁଦୂର ସହରରେ
ପାଥେୟ ଆଜି ସରକାର ଙ୍କ ଠାରୁ
ପାଉଥିବା ପାଞ୍ଚ କେଜି ଚାଉଳ
ଆଉ ବିଧବା ଭତ୍ତା ।
ମୃତ୍ୟୁ ର ବିଭିଷିକାରେ
ଜମିବାଡ଼ି ସବୁ ବନ୍ଧକ
ଗାଈ ଗୋରୁ ବିକ୍ରି ହୋଇଗଲା ।
ଆଖିର ଦୁଇ ଧାର ଲୁହ ସାହାରା
ଅତୀତର ସ୍ମୁତି ରୋମନ୍ଥନେ
ବ୍ୟାକୁଳ ହୃଦୟ
ବାପା,ଭାଇଙ୍କ ନୟନ ପିତୁଳା
ଛୋଟ ବେଳୁ ମା ଛେଉଣ୍ଡ ।
ବାପା ଭାଇଙ୍କ ଅନ୍ଧର ଲଉଡ଼ି
ଗେଲବସରେ ପ୍ରତିପାଳିତ ଝାନସୀ
ଜୀବନର ଯୁଦ୍ଧେ ହାରିଗଲା
ବିବାହ ପରେ
ସ୍ବାମୀ ମାନସିକ ରୋଗାକ୍ରାନ୍ତ ।
ସ୍ବାମୀଙ୍କ ଦୁଃଖରେ ମର୍ମାହତ
ବହୁ ଚିକିତ୍ସାରେ ପରେ ବି
ଶଙ୍ଖା ସିନ୍ଦୁର ବଞ୍ଚାଇ ପାରିନଥିଲା
ଶିଶୁ ପୁତ୍ର ଦୁଇ ଛାଡି
ସ୍ବାମୀ ଚାଲିଗଲେ ଆରପାରି ।
ଭାଇର ଝିଅ ଇଜ୍ଜତ ସମ୍ମାନକୁ ଭୁଲି
ଅନ୍ୟ ଯୁବକ ସହ ବିବାହ ରେ
ଭାଇ ମଧ୍ୟ ଅପମାନ ଓ ଲୋକନିନ୍ଦାରେ
ମୃତ୍ୟୁ ପଥର ଯାତ୍ରୀ ।
ଏକମାତ୍ର ପୁତ୍ରର ମୃତ୍ୟୁ
ଝିଅର ବୈଧବ୍ୟ ଯନ୍ତ୍ରଣାରେ
ବ୍ୟାକୁଳିତ ପିତା
ଶେଷ ନିଃଶ୍ୱାସ ତ୍ୟାଗ କଲେ
ଦୁଃଖ ଉପରେ ନଳିତା ବିଡା ସମ
ଝାନସୀର ଚତୁଃପାର୍ଶ୍ଵରେ ଅନ୍ଧକାର ।
ଭାଗ୍ୟକୁ ଆଦରି
ବଞ୍ଚିବାର ପ୍ରୟାସ ଜାରି ରଖେ କି
ବଡ଼ପୁଅ ର ଆକସ୍ମିକ ମୃତ୍ୟୁ ରେ
ସ୍ଥାଣୁ ପଥର ପାଲଟି ଯାଏ
ଆଖିରେ ଦୁଇ ଧାର ଲୁହ ନେଇ ।
ମାନସିକ ଚିନ୍ତାରେ ରୋଗାକ୍ରାନ୍ତ
ସୁଗର ଠାରୁ ବ୍ଳଡପ୍ରେସର ପର୍ଯ୍ୟନ୍ତ
ତଥାପି ନିଷ୍ଠୁର ଜୀବନ
ବଞ୍ଚି ଚାଲିଛି
ଆଖିର ଲୁହ ଓଠରେ ପିଇ ।