ଦଶହରା
ଦଶହରା
ଆସିଛିରେ ଆଜି ଦଶହରା,
ଆଣିଛି ଖୁସିର ପସରା,
ସହରଠୁ ଗାଁଆ ସବୁଆଡେ ଖାଲି ଛୁଟୁଛି ଖୁସିର ଫୁଆରା |
ଆକାଶରେଧଳା ବଉଦ,
ନଦୀ ଜଳ ଦିଶେ ସଫେଦ,
ଚାନ୍ଦର ଉଜ୍ଜଳେ ବାରି ହେଉନାହିଁ ଦିନକି ରାତିରେ ପ୍ରଭେଦ |
ଆକାଶରେ ଚାନ୍ଦ ରୋଷଣୀ,
ମାଟିରେ ସବୁଜ ବନାନୀ,
ଶେଫାଳୀ ଗାଲିଚା ବିଛାଇ ଡାକୁଛି ଆସ ମାଆ ମହିଷା ମର୍ଦ୍ଦିନୀ
କାଶତଣ୍ଡି ନଦୀ ପଠାରେ
ମୁକୁଟ ନାଇ ତା ମଥାରେ,
ଡାକୁଛି ଆସ ମାଆ କୃପାଦୃଷ୍ଟି ଟିକେ ଢାଳିଦିଅ ଏଇ ସଂସାରେ |
ତୋରଣ,ମଣ୍ଡପ,ଆଲୋକ,
ଏକୁ ବଳି ଏକ ଝଲକ,
ସଞ୍ଜ ନଇଁ ଗଲେ ଦେଖଣାହାରୀଙ୍କ ଆଖିରେ ପଡୁନି ପଲକ |
ଦୋକାନରେ ଭିଡ ଜମୁଛି,
ଗ୍ରାହକଙ୍କ ସଂଖ୍ୟାବଢ଼ୁଛି
ଦେଖିଲେ ଲାଗୁଛି ସତେକି ସେଠାରେ ପ୍ରତିଯୋଗୀତାକି ଲାଗିଛି |
ଛୁଟି ଏବେ ସବୁ ଅଫିସି,
ଦରମା ବୋନସ୍ ମିଳିଛି,
କର୍ମଚାରୀମାନେ ଖୁସିରେ ଦେଶ ଓ ବିଦେଶରେ ଖୁସି ମନାନ୍ତି |
ଦଶହରା ଏବେ ସରିବ,
ମାଆ ଚାଲିଯିବେ ସରଗ,
ମହିଷା ସହିତ ମଦିରା ମର୍ତ୍ତ୍ୟରେ ମଣିଷ ସହିତ ରହିବ |
ସବୁବର୍ଷ ପୁଜା ଆସୁଛି,
ଖୁସିର ପସରା ବାଣ୍ଟୁଛି,
ହେଲେ ମଣିଷ ପ୍ରକୃତି ବଦଳୁନି ଜମା ଯେମିତି ସେମିତି ରହୁଛି |