"ଦୀପାଳି" ର ଦୃଶ୍ୟ

"ଦୀପାଳି"ର ଦୃଶ୍ୟ ଆମ ସମାଜରେ

ପ୍ରତିଫଳିତ ହୁଅଇ

ଏକ ଅହେତୁକ ଉନ୍ମାଦନା ଜାଗି 

ସଭିଙ୍କୁ ଦିଏ ଜଗାଇ ।

ଭାରତୀୟ ସଂସ୍କୃତିର ମହାନତା

ପୁରାଣରେ ଅଛି ବର୍ଣ୍ଣନ 

ବିଜୟ ଉତ୍ସବ ପାଳନ ବିଧାନ

ରାତ୍ରୀ ଦୀପ ପ୍ରଜ୍ଜ୍ୱଳନ ।

ସେଇ ପରମ୍ପରା ହେଉଛି ପାଳନ

ରାତ୍ରୀ କାଳୀଙ୍କ ପୂଜନ

ଦୀପାବଳି ନାମେ ଆଲୋକର ପର୍ବ

ରହିଛି ବିଧି ବିଧାନ ।

ପିତୃ ପୁରୁଷଙ୍କୁ ଆଲୋକ ପ୍ରଦାନ

ପୁଣ୍ୟ ହୁଅଇ ଅର୍ଜ୍ଜନ 

ପିତୃ ପୁରୁଷଙ୍କୁ ଦୀପ ଦାନ ଦେଇ

କିମ୍ପା ଫୁଟାଇବା ବାଣ ।

ପୂର୍ଣ୍ଣିମାର ଭ୍ରମ ଅମାବାସ୍ୟା ରାତ୍ରୀ

ପରିବେଶ ଆଲୋକିତ

ଆଲୋକ ରୂପକ ଚାଦର ଘୋଡେ଼ଇ

ଧରିତ୍ରୀ ହୁଏ ଶୋଭିତ ।

ଆଲୋକର ପର୍ବ ପୁର ପଲ୍ଲୀରେ

ପ୍ରତି କ୍ଷେତ୍ରରେ ଉଲ୍ଲାସ

ସବୁରି ମୁଖରେ ଫୁଟୁ ଅଛି ହସ

ପିଠା ମିଠା ର ସୁବାସ ।

ଆନନ୍ଦ ମୁଖର ସାରା ପରିବେଶ

ଝିଲିମିଲି ଆଲୋକରେ

ମା କାଳୀଙ୍କ ପୂଜା ଆରାଧନା ହୁଏ

ନିଷ୍ଠା ଭକ୍ତି ସହକାରେ ।

ଆଜିକାଲି ଆଲୋକ ଠୁ ବାଣ ବେଶି

ବାଣ ଫୁଟା ରେ ହିଁ ଖୁସି

ଆଲୋକରେ ହିଁ ଅନ୍ଧାର ଦୂରୀଭୂତ

ଜ୍ୟୋତିର ମହତ୍ତ୍ଵ ବେଶି ।

ଜ୍ଞାନ ସମ ଦୀପ ଜଳୁ ହୃଦୟରେ

ମନ୍ଦ ନ ରହୁ ମନରେ

ଶପଥ ଉଜ୍ଜୀବିତ ହେଉ ମନରେ

ଏହି ଶୁଭ ମୁହୂର୍ତ୍ତରେ ।

ଦୀପ ଆଲୋକେ ଅନ୍ଧାର ନାଶ ପରି

ଜ୍ଞାନ ବଳେ ପାପ ମନରୁ 

ଭାଇଚାରା ମନୋଭାବ ଉଜ୍ଜୀବିତ

ହେଉ ପ୍ରତି ହୃଦୟରୁ ।

ସତ୍ୟ ଧର୍ମର ବିଜୟ ବାରତା

ପୁରାଣେ ରହିଛି ଗାଥା 

ଧର୍ମର ହାନି ଘଟୁଛି ପ୍ରତି କ୍ଷଣେ

ସତ୍ୟ ପାଉ ଅଛି ବ୍ୟଥା ।

ଆସ ଦୀପ ଜାଳି ସ୍ବାଗତ କରିବା

ନ୍ୟାୟ ପନ୍ଥା ରେ ଚାଲିବା

ବିଜୟ ହୋଇଲେ ଉତ୍ସବ ପାଳିବା

କିନ୍ତୁ ବାଣ ନ ପୋଡ଼ିବା 

ଆଲୋକମାଳାରେ ଚାକଚକ୍ୟ ଘର

ଧନୀ ପଇସା-ବାଲାର

କେବଳ ଅନ୍ଧାର ରାଜୁତି କରୁଛି

ଗରିବ ଘର ଭିତର ।

ମିଠା ପିଠା ବାଣ ଓ ନୂଆ ପୋଷାକ

ନାହିଁ ଗରିବ ଭାଗ୍ୟରେ

ଦୀପାବଳୀ ନାମ ଶୁଣି ବୁଦ୍ଧି ବଣା

ଦର ବୃଦ୍ଧି ବଜାରରେ ।

ଦୀପାବଳୀ ପର୍ବର ମହତ୍ତ୍ଵ ସେହି

ଧନୀ ଲୋକଙ୍କୁ ହିଁ ଜଣା 

ଅଳ୍ପ ପଇସାରେ ଦୀପାଳି ପାଳନ

ଗରିବର ବୁଦ୍ଧି ବଣା ।

ଯେଉଁ ପିଲାର ବାପା ଦିନ ମୂଲିଆ

ଚାହେଁ କବାଟ ପାଖରେ

ବାପା କେତେବେଳେ ଆଣିବେ ଫୋଟକା

ବାଣ ଫୁଟେ ପାଖ ଘରେ ।

କୁମ୍ଭାର ର ମାଟି ତିଆରି ଦୀପର

ବିକ୍ରି ନ ହୋଇ ରହିଛି

ନାମକୁ ମାତ୍ର ମୂଲ୍ୟ କେତେ ପଚାରି

ଗ୍ରାହକ ଫେରି ଯାଉଛି ।

ବିଜୁଳି-ବତୀ ର ଚାହିଦା ବଢ଼ିଛି

ମାଟି ଦୀପ କିଏ ନେବ

କୁମ୍ଭାର ପିଲାଙ୍କର କି ଖୁସି ହେବ

ଯଦି ଦୀପ ବିକ୍ରି ନ ହେବ ।

ଆମ ପାଖେ ଛୋଟ ଗରିବ ବେପାରୀ 

ଖୋଲା ଆକାଶର ତଳେ

ଆଶା ବାନ୍ଧି ରହିଛନ୍ତି ବିକ୍ରି ହେଲେ

ଘର ଚଳାଇବେ ଭଲେ ।

ନିହାତି ଗରିବ କିଛି କହେ ନାହିଁ

ଦୀପାଳି ରେ ଶ୍ୱାସରୁଦ୍ଧ

ନିଜ ପିଲାଙ୍କ ମୁହଁରେ ହସ ନାହିଁ

କିଏ ବା ଦେଉଛି ବୋଧ ।

ଆସ, ମାଟି ତିଆରି ଦୀପ କିଣିବା

ରାସ୍ତା କଡେ ବିକ୍ରି ଯାହା

କୁମ୍ଭାରର କିଛି ରୋଜଗାର ହେବ

ତା ପିଲାଙ୍କୁ ହେବ ସାହା ।

ଘରକୁ ଆସିବା ଅବା ଭେଟି ମିଠା

ଗରିବଙ୍କୁ ଦେଇ କିଛି

ହସ ଫୁଟାଇବା ତାଙ୍କରି ମୁହଁରେ

ଯିଏ ଶୁନ୍ୟକୁ ଚାହିଁଛି ।

ଗରିବ ଘର ଆଗରେ ଦୀପ ଟିଏ

ରଖି ଆଲୋକ କରିବା

ଆମ ପାଖେ ରହି ଆମର ଖୁସିରେ

ତାଙ୍କୁ ସାମିଲ କରିବା ।

ନିଜ ଘର ସହିତ ଅଭାବୀ ଘରେ

ଚାଲ ଦୀପ ଜଳାଇବା

ହେଉ ଦୀପାବଳୀ ଭାଇଚାରା ର ପର୍ବ 

ଖୁସି ସଭିଙ୍କୁ ବାଣ୍ଟିବା ।

ଯେ ଦେଶ ପାଇଁ ଶହୀଦ ହୋଇଛନ୍ତି

ତାଙ୍କର ଘରକୁ ଯିବା

ଶହୀଦଙ୍କ ପରିବାର ସହ ମିଶି

ନିହାତି ଦୀପ ଜାଳିବା ।

ଯେଉଁ ସୈନିକ ସୀମାରେ କାର୍ଯ୍ୟରତ

ଶୁଭ ମନାସ ସହିତ

ଦୀପ ପ୍ରଜ୍ଜ୍ୱଳନ କରିବା ଖୁସିରେ

ରଖିବା ଦୀପାଳି ମହତ୍ତ୍ଵ ।

ବାଣରେ ହୁଏ ପରିବେଶ ଦୂଷିତ

ବାଣ ବିନା ହେଉ ପର୍ବ

ଆଜିଠାରୁ ସର୍ବେ ହେଲେ ସଚେତନ

ଆଗାମୀ ପିଢ଼ି ବଞ୍ଚିବ ।

ଦୀପାବଳୀ ଖୁସିରେ ହସେ ଧରିତ୍ରୀ

ରାତ୍ରୀ ଆଲୋକର ପର୍ବ

ଯୁଗ ଯୁଗ ଧରି ରହିଛି ରହିବ

ଦୀପାବଳୀ ଆମ ଗର୍ବ ।