ଦୀପାଳି ଗୋ

ଦୀପାଳି ଗୋ' ତୁମ ବିନା ମୁଁ ଜଳୁଛି

କିବା ଦିନ କିବା ରାତି ,

ମେଞ୍ଚାଏ ଅନ୍ଧାର ଚେନେ ଆଲୁଅରେ

ସେକୁଛି ଅତୀତ ସ୍ମୃତି ......

ଲେଖିଥିଲି କିଛି ଲହୁ ଲୁହ କଥା

ପୋଡ଼ିଗଲା ସେଇ ଚିଠି ,

ବିନା ବରଷାରେ ଲୁହେ ଭାସିଗଲା 

ଠିକଣା ବିନା କେଉଁଠି......

ମୃଦୁ ହସ ତଳେ କେତେ ଅଭିନୟ

ହଜିଛି ଅତୀତ ସ୍ମୃତି ,

ଅଳସି ଓଠରେ ଭଟ୍ଟା ପଡ଼ିଯାଏ

ବାହୁନି କାନ୍ଦଇ ନିତି ......

ଦୂର ଦିଗନ୍ତର ଦଗ୍ଧ ଅନଳରେ

ରକ୍ତିମ ରଙ୍ଗ ପ୍ରକୃତି ,

ଭାଙ୍ଗିଛି ମନ୍ଦିର ମୁଖଶାଳା ଖୋଜେ

ପାଇବା ପାଇଁ ମୁକତି ......

ଦୀପାଳି ଗୋ' ତୁମ ବିନା ମୁଁ' ଲିଭିବି

ପାହିଗଲେ ଅମା ରାତି ,

ଅଣନିଃଶ୍ବାସୀ ମୁଁ ' ଜଳିଲା ପ୍ରଦୀପ

କରୁଣ ସ୍ୱରର ଗୀତି......