ଦିଗନ୍ତର ଯାତ୍ରା ପଥେ

ଖୋଜୁଛି ମଣିଷ ଦିଗନ୍ତ ବିସ୍ତାରୀ

ଗ୍ରହାନ୍ତର ଅନ୍ତରୀକ୍ଷ

ବୁଝିଅଛି କିଛି ଅବୁଝା ଅନେକ

ସୃଷ୍ଟି କାରଣ ରହସ୍ୟ ।

ଦିଗନ୍ତର ଯାତ୍ରା ଅସୀମ ଅନନ୍ତ

ସୀମିତ ମନୁଷ୍ୟ ଜ୍ଞାନ

ତଥାପି ବିଜ୍ଞାନ କରେ ଉଦ୍ଭାବନ

ସତ୍ୟ କରେ ଉନ୍ମୋଚନ ।

ପୁରାଣ ଦର୍ଶନ ପ୍ରଯୁକ୍ତି ବିଜ୍ଞାନ

ହୁଏ କ୍ରମେ ସମନ୍ୱିତ

ବଢେ ଅଭିଜ୍ଞତା କର୍ମ ନିପୁଣତା

ସନ୍ଧାନ ହୁଏ ଅବ୍ୟର୍ଥ ।

ଭୟଙ୍କର ଅତି ଜ୍ଞାନ ବିଜ୍ଞାନର

ଅଯଥା ଦୁରୁପଯୋଗ

ହିତ ନୁହେଁ ଖାଲି ଅଟେ କ୍ଷତିକର

ଧ୍ୱଂସ ମୁଖେ ଆଜି ବିଶ୍ୱ ।

ବହୁ ମାରାତ୍ମକ ରୋଗବ୍ୟାଧି ଆଜି

ହୋଇଅଛି ନିୟନ୍ତ୍ରଣ

ରୋଗର ଚିକିତ୍ସା ସଠିକ ନିଦାନ

କରଇ ହିତ ସାଧନ ।

ନୂତନ ଆୟାମ ସୁବିଧା ସୁଯୋଗ

ହେଉଅଛି ଉପଲବ୍ଧ

ଦିଗନ୍ତର ଯାତ୍ରା ଚାଲେ ଅବିରତ

ଉନ୍ମୁକ୍ତ ପଥ ବିସ୍ତୃତ ।