ଦିଗନ୍ତ

ହସିଲାଣି ଏବେ ଗାଆଁ ନଈପଠା

ଶୋରିଷ ଫୁଲର କ୍ଷେତ,

ମେଳଣ ପଡ଼ିଆ ଭିଡ ଲାଗିଲାଣି

ଶୁଭିଲାଣି ନାଚ ଗୀତ ।

କେତେ ନିରିଜନ ରାତିର ଅନ୍ଧାରେ

ଫୁଟି ଶେଫାଳିର କଢି,

ସୁରୁଜ ଆସିବା ଆଗରୁ ଲାଜରେ

ମାଟିରେ ଗଲାଣି ଝଡି ।

ସୁଲୁ ସୁଲୁ ବହେ ଉତ୍ତରା ପବନ

କାଶଫୁଲ ଦେହ ଛୁଇଁ,

ପୂରୁବ ଆକାଶେ ପାହାଡ଼ ସେପାଖେ

ସୁରୁଜ ଆସଇ ଉଇଁ ।

ନଈପଠା ପରେ ବାଲିରେ ଖେଳଇ

ଦୂର ଆକାଶର ରବି,

ଗୋଧୂଳି ସଂଜରେ ଶରତ ବନ୍ଦାଏ

ପଶ୍ଚିମ ଆକାଶେ ଛବି ।

ଦୂର ଦିଗନ୍ତରେ ମେଲାଣି ନିଅନ୍ତି

ପକ୍ଷୀମାନେ ମେଳି ହୋଇ,

ଆକାଶର ରଙ୍ଗ ସତେକି ଯେମିତି

କିଏ ବସି ଦିଏ ଧୋଇ ।

ନଈ ବନ୍ଧପରେ କାଶତଣ୍ଡି ବସି

ପିନ୍ଧୁଥାଏ ଧୋବ ଶାଢ଼ୀ ,

ଛାଇ ଲେଉଟାଣି ବେଳେ ବଗ ପଲ

କେତେ ଯାଉ ଛନ୍ତି ଉଡି ।

ଶରତ ଆକାଶ ନିରିଜନ ଗୋଟେ

ଛୁଟି ଅବସର ବେଳା ,

ନାହିଁ କୋଳାହଳ ବଉଦଙ୍କ ଭିଡ଼

ମେଘ ବିଜୁଳିର ମେଳା ।