ଧରିତ୍ରୀ ଧରିଛି ଧର୍ମ ନିକିତି

ଧର୍ମ ଅଧର୍ମରେ ମାତଇ ମାନବ

ଭାବି ନିଜଠାରେ ଅସୀମ ଶକ୍ତି

କର୍ମ ପରିଣାମ ଦର୍ଶାଇବା ପାଇଁ

ଧରିତ୍ରୀ ଧରିଛି ଧର୍ମ ନିକିତି ।

ଅଧର୍ମେ ପୃଥିବୀ ଧେନୁ ରୂପ ଧରି

ଶସ୍ୟବୀଜସବୁ ଖାଇ ଲୁଚିଲା

ପୃଥୁ ନରପତି ଧରମ ବଳରେ

କ୍ଷୀର ସ୍ରବୀ ଶସ୍ୟଶ୍ଯାମଳା ହେଲା ।

ବର୍ଣ୍ଣଇ ଏକଥା ପୁରାଣର ଗାଥା

ଯାହା ସତ ସମ ପ୍ରତୀୟମାନ

ଧରିତ୍ରୀ କୋପରେ ପ୍ରକୃତି କୋଳରେ

ଆଜି ବି ତାଣ୍ଡବଲୀଳା ଦର୍ଶନ ।

କେବେ ବନ୍ୟା, ବାତ୍ଯା କେବେ ଭୂମିକମ୍ପ

ସାଗରରେ କେବେ ଆସେ ସୁନାମୀ

ଟର୍ଣ୍ଣାଡୋ ରୂପରେ ବିସ୍ତୀର୍ଣ୍ଣ ଭୂଖଣ୍ଡେ

କେବେ ବାୟୁ ହୁଅଇ ବେଗଗାମୀ ।

ଧର୍ମ ହେଲେ କ୍ଷୀଣ ଧରା ପ୍ରତିକ୍ଷଣ

ପାପର ଭାରାରେ କରି ରୋଦନ

ଶିକ୍ଷାଦେବା ପାଇଁ ତାଣ୍ଡବ ରଚଇ

ଭୟରେ କାତର ମଣିଷ ମନ ।

ଏ ଦୁର୍ବିପାକରେ ଅସଂଖ୍ୟ ସଂହାରେ

ନିକିତିରେ ପାପ ପୁଣ୍ୟ ତଉଲି

ନାହିଁ କା' ସାମର୍ଥ୍ୟ କରିବାକୁ ରୋଧ

ଜ୍ଞାନନେତ୍ର ଯେତେ ପାରିଲେ ଖୋଲି ।

ଧରଣୀର ଧନ ପରା ଯେତେ ବଣ

ପାହାଡ଼, ପର୍ବତ, ଜଳର ଉତ୍ସ

ତାହାର ସୁରକ୍ଷା ଆମ ଜୀବ ରକ୍ଷା

ଏଥିରେ ସକଳେ ଲଗାଅ ମନ ।