ଧନ ରୁହ ଚୁପଚାପ

ଡରି ଯାଅନାହିଁ ଧନମାନେ ମୋର

ବରଷା ବତାସ ଦେଖି ,

ଡେଣା ମେଲି ଏବେ ଏଇ ବିପଦରୁ 

ତୁମକୁ ମୁଁ ଦେଉଛି ରଖି ।

କେତେ ଆଶା କରି କାଠି କୁଟା ନେଇ

ଗଢ଼ିଥିଲି ଏଇ ବସା ,

କିଛି ଦିନ ପରେ ଡିମ୍ବ ଦେଲି ଯେବେ

ଜାଗିଲା ମାତୃତ୍ବ ନିଶା ।

କେତେଦିନ ତାକୁ ଉଷୁମାଇଲାରୁ

ଅଣ୍ଡାରୁ ଫୁଟିଲ ତୁମେ ,

ଖୁସିରେ ଆହାର ଖୁଆଇଲି ଆଣି

ଦିନ ସାରା ଲାଗି କାମେ ।

କିଚିରି ମିଚିରି ଗୀତ ଶୁଣି ତୁମ

ଭୁଲିଯାଏ ସବୁ ବାଧା ,

ବଡ଼ ହୋଇ କେବେ ଉଡ଼ିବା ଶିଖିବ

ମନେ ଭାବୁଥାଏ ସଦା ।

ଅବେଳରେ ଆଜି ଆସି ଏହି ଝଡ଼

ଦେଖାଏ କରାଳ ରୂପ ,

ମୋ ପକ୍ଷ ବିସ୍ତାରି ସୁରକ୍ଷା ଦେଉଛି

ଧନ ରୁହ ଚୁପଚାପ ।

ବଡ଼ ହୋଇ ତୁମେ ଉଡ଼ିବ ନିଶ୍ଚୟ

ଆକାଶରେ ଡେଣା ମେଲି ,

ବିପଦ ସହିତ ମୁକାବିଲା କରି-

ପାରିବ ଭରସା ଦେଲି ।