ଧାରା ଶ୍ରାବଣ

ଶ୍ରବଣା ତାରକା ଉଦିତ ନଭେ

      ଶ୍ରାବଣ ଅଶନୀ ଶୁଭଇ ଦମ୍ଭେ l

ଧାରା ଶିରାବଣ ବରଷା କାଳ

      ତାଳଗଛେ ସବୁ ପାଚିଲା ତାଳ l

କଦମ୍ବ କୁସୁମେ ଶୋହୁଛି ବନ

     ବୃନ୍ଦାରଣ୍ୟେ ବିଜେ ରମାରମଣ l

ଘନ ବିଦ୍ୟୁଲତା ବରଷା ଧାରା

    ଦିନ ଲାଗେ ରାତି ନପଡ଼େ ଖରା l

ଘୋର ବରଷାରେ ପଖିଆ ଭିଡ଼ି

      ଚଷାଭାଇ ଗଲା ବିଲ ବେଉଡ଼ି l

କଳାମେଘ ଦେଖି ମୟୁର ଗଣ

        ଆରମ୍ଭି ଅଛନ୍ତି ପ୍ରେମ ନର୍ତ୍ତନ l

କେବେ ପୁଣି ନଭେ ଶକ୍ର କାର୍ମୁକ

        କବି ଭାବୁକର ଭାବ ଉଦ୍ରେକ l

ଆକାଶରେ ଲୁପ୍ତ ତାରକା ଗଣେ

 ଜ୍ୟୋତି ଦେଖାବନ୍ତି ଜ୍ୟୋତିରିଙ୍ଗଣେ l

ଶୈବ ପିଠେ ଭିଡ଼ କାଉଡ଼ି ଭାଇ

      ଜାହ୍ନବୀ ଜଳରେ ଶିବ ଗାଧୋଇ l

କୃଷକ ଘରଣୀ ଚିତୋଉ ପିଠା

      ପିଢ଼ାରେ ମାଡ଼ିଲା କୁଆ ମଣିତା l

ଭାଇଙ୍କୁ ଭଉଣୀ ବାନ୍ଧିଲେ ରାକ୍ଷୀ

      କାଳେ କାଳେ ଥିବ ମହତ ରଖି l

ଜନମ ଲଭିଲେ ଶ୍ରୀବଳଦେବ

        ଚଷାପୁଅ ପୂଜ୍ୟ ଇଷ୍ଟ ବାନ୍ଧବ l

ଝୁଲଣ ପୂର୍ଣ୍ଣିମା ରାଧା ଗୋବିନ୍ଦ

       ଝୁଲିରେ ଝୁଲିଲେ ପରମାନନ୍ଦ l

ଘନ କାଳ ଜନ ମଙ୍ଗଳ କାରୀ

       ପରଜା ପାଳନେ ବର୍ଷିଲେ ହରି l

ଶିରାବଣ ଶେଷେ ମାସ ଭୋଦୁଅ

       ଗୋପେ ଜନମିବେ ଗଉଡ଼ ପୁଅ l

ଗଜ ବଦନଙ୍କ ଦିବ୍ୟ ପୂଜନ l

        ନମଃ ନମଃ ପ୍ରଭୁ ସୃଷ୍ଟି କାରଣ l